Н.Эрдэнэхүү: Шинээр оруулж ирэх хавдрын эмийн татварт ₮500 сая төлөхийг сайд шаардсан. Хүссэн зүйлийг нь хийгээгүйнхээ төлөө ажлаасаа чөлөөлөгдлөө

Гэрэл зургийг MPA агентлагийн онцгой зөвшөөрөлтэйгөөр ашиглав

Хавдар Судлалын Үндэсний Төв (ХСҮТ)-ийн захирал Н.Эрдэнэхүүг ажлаас нь чөлөөлж, Анагаах ухааны доктор М.Адилсайханыг томилсон юм.

Энэ талаар ХСҮТ-ийн захирал асан Н.Эрдэнэхүү "Өнөөдөр ажил үүргээ гүйцэтгэж байх үед буюу 11:00 цагийн үед Эрүүл Мэндийн Яам (ЭМЯ)-наас Ажлын хэсэг ирж, сайд Т.Мөнхсайханы тушаалыг танилцууллаа. Уг тушаалын дагуу ХСҮТ-ийн ерөнхий захирлын үүрэг гүйцэтгэгч Н.Эрдэнэхүү миний бие ажлаа хүлээлгэн өгч байна.

Сайд өөрийн эрхийн хүрээнд болон Хөдөлмөрийн тухай хууль гэсэн хоёр заалтыг үндэслэн ажлаас чөлөөлж байгааг мэдэгдсэн. Энэ шийдвэрийг гаргахдаа ямар нэг үндэслэл дурдаагүй. Тодруулж хэлбэл намайг үндэслэлгүйгээр ажлаас чөлөөллөө.

Нэгэнт сайдын шийдвэр гарсан тул бид ямар нэг байдлаар эсэргүүцэлгүй, ажлаа хүлээлгэн өгч байгаа. Гэхдээ гарсан тушаалтай нь холбоотойгоор хэдэн зүйлийг хэлэхгүй бол болохгүй гэдэг үүднээс сэтгүүлчдэд хандлаа.

Хэрвээ ажилтан ямар нэг зөрчил гаргаагүй бол тухайн хүнийг ажлаас чөлөөлөхдөө нэг сарын өмнө мэдэгдэж байх ёстой. Хөдөлмөрийн тухай хуульд тодорхой заачихсан зүйлийг зөрчсөн байна. Хоёрдугаарт ямар нэг зөрчил гаргаагүй хүнийг шууд үүрэгт ажлаас нь чөлөөлсүгэй гэдэг сайдын тушаал гардаг болжээ.

Өнгөрсөн хугацаанд ЭМЯ-ны сайд Т.Мөнхсайхан ажлаа хүлээж авснаас хойш хавдрын чиглэлээр манайхтай хамтарч эхэлсэн.

Энэ хугацаанд маш олон дарамт ирж байсан. Байнга ажлаа өг гэдэг байсан ч бид ажлаа маш сайн хийдэг байсан учраас намждаг байсан. Нэгдүгээр сараас хойш хавдрын чиглэлээр ЭМЯ дөрвөн талт гэрээг байгуулж шинэ эмийг хандиваар оруулж ирсэн. Улмаар ХСҮТ дээр ирээд эмийн татварт 500 сая төгрөг өгөхийг шаардсан юм.

Өөрийнх нь хүссэн зүйлийг хийгээгүйн төлөө өнөөдөр би ажлаа өглөө. Эрүүл мэндийн салбар улс төрөөс хол байх ёстой. Ажил сайн хийж байгаа хүмүүсээ улам дэмжиж, ажлаа хийж чадахгүй цүнх баригч нарыг багасгаснаар Монгол Улс хөгжинө. Ажлын хэсэг надад халагдах тушаалыг танилцуулахад Т.Мөнхсайхан сайдыг надтай уулзчихгүй дээ гэж бодсон. Би өөрт нь ч хэлж байсан. "Эрүүл мэндийн салбар үнэнд гүйцэгдэж өөрийг чинь асуудалд оруулах учраас төсөв даатгалын зарцуулалт болохгүй байна, улсын эмнэлгээ чанаржуулах хэрэгтэй" гэж нэг бус удаа хэлсэн" гэв.