Хүн дүрст роботууд анх удаагаа хүмүүстэй хамт марафонд уралдлаа

Бямба гарагт Хятадын нийслэл Бээжин хотод зохион байгуулагдсан хагас марафон гүйлтийн тэмцээнд 21 хүн дүрст робот олон мянган тамирчидтай зэрэгцэн оролцжээ.

Энэ бол 21 км-ийн зайн гүйлтэд анх удаа машинууд хүмүүстэй уралдсан тохиолдол юм байна.

Droid VP, Noetix Robotics зэрэг Хятадын компаниудын зохион бүтээсэн роботуудын зарим нь 1.2 метр хүрэхгүй намхан, зарим нь 1.8 метр хүртэл өндөр биетэй байжээ.

Нэг роботыг бараг хүн шиг болсон, эмэгтэйлэг шинж чанартай, инээмсэглэж, нүдээ ирмэх чадвартайг үйлдвэрлэгч нь сурталчилж байлаа.

 

Роботуудыг гүйхэд мэргэжилтнүүд нь дагаж гүйсэн байна. Роботуудын цөөн хэсэг нь гүйлтийн гутал өмссөн байсан бол нэг нь гартаа боксын бээлий өмссөн байв.

Бээжингийн Хүн Роботын Инновацын Төвийн бүтээсэн Тянгон Ультра нэртэй робот хагас марафоны замыг хоёр цаг, 40 минутад туулсан амжилтаар бусад роботуудаас түрүүлжээ.

Харьцуулбал энэ уралдааны эрэгтэй ангиллын ялагч замаа нэг цаг, 2 минутад дуусгасан байна.

Түрүүлсэн роботыг зохион бүтээсэн байгууллагын 43 хувийг Хятадын төрийн өмчит компаниуд, үлдсэн хувийг Xiaomi, UBTech хувийн компаниуд ижил хэмжээтэй эзэмшдэг ажээ.

UBTech бол Хятадын хүн дүрст робот технологийн тэргүүлэгч компани юм.

“Би гайхуулж, сайрхахыг хүсэхгүй байгаа ч Өрнөдийн ямар ч компанийн робот Тянгон Ультрагийн амжилтыг гүйцэхгүй” гэж зохион бүтээсэн төвийн технологийн ахлах ажилтан Тан Жянь ярьжээ.

Тянгон Ультрагийн урт хөл, хүний гүйх хөдөлгөөнийг дуурайх боломжтой алгоритм нь уралдаанд давуу тал болсныг тэр бас хэлсэн байна.

Уралдааны явцад энэхүү роботын батарейг гурван удаа сольжээ.

 

Роботуудын хувьд анхны марафон нь бас тийм ч амар байгаагүй юм.

Нэг робот гараанаас гарсныхаа дараахан газарт унаж, хэдэн минутын дараа босож чадсан байна. Бас нэг робот хэдхэн метрийн зайд гүйснийхээ дараа замаас гарч, хашлага мөргөжээ.

Хятад улсад өмнө нь роботуудыг уралдаанд гүйлгэн туршиж байсан ч анх удаа хүмүүстэй зэрэгцэн уралдсан нь энэ юм байна.

Эх сурвалж: Reuters