Америк залуу дэлхийн бүх улсаар аялах зорилгоо гүйцээхийн тулд Пёняны марафонд оролцжээ

Өнгөрсөн долоо хоногт Умард Солонгосын нийслэл Пёнян хотод олон улсын марафон гүйлт зохион байгуулагдахад 200 орчим гадаадын иргэн оролцжээ.

Энэ гүйлт 2019 онд хамгийн сүүлд зохион байгуулагдсан бөгөөд цар тахлын улмаас зургаан жил тасалдаад байсан юм.

Умард Солонгосын эрх баригчид 2024 оны нэгдүгээр сараас хилийн хоригоо цуцалж, Оросын жуулчдыг хүлээн авч эхэлжээ. Энэ оны хоёрдугаар сараас бусад улсын жуулчдыг Расон боомтоороо хүлээж авч эхэлсэн ч удалгүй ямар нэг шалтгаангүйгээр зогсоосон юм.

Тиймээс гадаадын иргэдийн хувьд Умард Солонгост хөл тавих ховор боломж нь марафон гүйлт байжээ.

Бээжинд үйл ажиллагаа явуулдаг Koryo Tours компани гадаадын марафончдыг Умард Солонгост нэвтрүүлэх онцгой эрхийг авч ажилласан юм.

Энэ үеэр АНУ-ын иргэн, 25 настай Камерон Мофид 10 км-ийн зайн уралдаанд оролцож, дэлхийн 195 дахь тусгаар улсад хөл тавих зорилгоо биелүүлж чаджээ.

 

Гиннесийн дээд амжилтын ном 2019 онд 21 настай түүнийг дэлхийн бүх тусгаар тогтносон улсуудад зочилсон хамгийн залуу хүнээр бүртгэж байсан байна.

Гэхдээ тэр хоёр Солонгосыг тусгаарладаг зэвсэггүй бүсэд хөл тавьснаа Умард Солонгост очсонд тооцуулж байжээ.

Харин ийм амжилтыг бүртгэдэг өөр нэг байгууллага болох Nomad Mania үүнийг нь хүлээн зөвшөөрөөгүй юм байна.

Тиймээс Мофид үлдсэн ганц улс болох Умард Солонгост очих боломжийг хүлээж байжээ.

Тэрбээр өсвөр насандаа газрын теннисээр хичээллэж, ирээдүйтэй тамирчин болохоо харуулж байсан байна.

Гэвч тохойндоо авсан гэмтэл нь түүнийг цаашид хичээллэх боломжгүй болгож байжээ.

Улмаар оюутан байхдаа Мофид гадаад орнуудаар аялах дур сонирхолтой болж, их сургууль төгсөхөөсөө өмнө дэлхийн бүх улсад хөл тавих зорилт тавьсан байна.

Өмнө нь тэр Умард Солонгост нэвтрэх гэж хоёр удаа оролдоод бүтэлгүйтэж байжээ.

“Би дэлхийн бүх улс оронд очиж үзсэн. Харин Умард Солонгост би амьдралдаа үзээгүй солиотой зүйл мэдэрлээ. 50,000 хүн дүүргэсэн цэнгэлдэх хүрээлэнд орж ирэхэд мэдэрсэн зүйл, адреналиныг юутай ч зүйрлэх аргагүй юм” гэж тэр сэтгэгдлээ ярьсан байна.

Эх сурвалж: South China Morning Post