АН-ын бүлэг Ерөнхий сайдыг гишүүдийн дунд суулгаж, гишүүд Ерөнхий сайдыг дуудаж асуулт асуудаг болох хуулийн төсөл боловсруулахаа мэдэгдэв
УИХ дахь Ардчилсан Намын бүлэг ээлжит хуралдаанаараа хэлэлцсэн асуудлын талаар мэдээлэл хийлээ.
УИХ-ын гишүүн Х.Тэмүүжин "1992 оны Үндсэн хуулийн гол үзэл санаа нь эрх мэдэл хуваарилалтын үзэл санаа байсан. Үүний гол зарчим нь УИХ нь төрийн эрх барих дээд байгууллага бөгөөд хууль тогтоох эрх мэдлийг дангаар хэрэгжүүлнэ гэдэг заалт бий. Улс орны дотоод, гадаад асуудлаар шийдвэр гаргана гэдэг эрх мэдэл УИХ-д хадгалагдаж байгаа.
Гэвч өнгөрсөн 30 жилийн хугацаанд том ухралт хийсэн. Түүний нэг нь юу гэхээр УИХ-ын чуулганы хойморт гүйцэтгэх эрх мэдлийн тэргүүн буюу Ерөнхий сайд гараад суучихдаг юм байна. УИХ-ын гишүүд Ерөнхий сайдаас асуулт асуухдаа хуралдаан даргалагчаас асууж байгаа юм шиг дүр төрх харагдах болсон. Парламентын ардчилал бүхий үндсэн хууль улс орнуудын парламентаас харахад парламентын танхимын толгойд Ерөнхий сайд нь гарч суудаг нэг ч улс алга. Тиймээс АН-ын бүлгээс Монгол Улсын Их Хурлын тухай хуульд өөрчлөлт оруулаад УИХ-ын чуулганы танхимд Ерөнхий сайд толгой дээр нь гараад суучихдаг байдлыг зогсоож, 126 гишүүний дунд орж суух ёстой гэдэг зарчмыг хэрэгжүүлэх хуулийн төсөл өргөн барина.
Хоёрдугаарт, УИХ-ын дэгийн тухай хуульд Ерөнхий сайдын мэдээллийг цаг гэдэг зохицуулалт бий. Ерөнхий сайд ямар мэдээлэл хийхээ өөрөө сонгож, түүнийг УИХ тойрч эргэлддэг байдал нь УИХ-ын өмнө Ерөнхий сайд ажлаа хариуцна гэдэг зарчмыг эвдэж байгаа. Тиймээс Ерөнхий сайдын мэдээллийг цагийг УИХ-ын гишүүдийн асуулгын цаг гэж өөрчлөөд Ерөнхий сайд, Засгийн газраас асуудаг болгох шаардлагатай байна. Ерөнхий сайд өөрийн биеэр хариулт өгдөг, тухайн асуудлыг хариуцсан сайдаа дагуулж орж ирдэг зарчим руу шилжихгүй бол парламент хяналтаа тавьж чадахгүй байна.
Гуравдугаарт, УИХ-ын гишүүдээс бусад этгээд буюу чуулганы хуралдаанд үг хэлж, мэдээлэл өгч байгаа албан тушаалтнууд хариуцлагатай байна гэдэг тогтолцоог оруулж ирэхгүй бол УИХ-ын чуулган дээр илт худал ярьдаг байдал газар авлаа.
УИХ-ын гишүүдээс бусад албан тушаалтан чуулганы нэгдсэн хуралдаанд хэлсэн үгэндээ хариуцлага хүлээдэг байх ёстой. УИХ-ын чуулганд мэдээлэл өгч байгаа албан тушаалтнуудыг худал мэдээлэл өгөхөөс хамгаалсан хуулийн зохицуулалт хэрэгтэй байна. Тиймээс Эрүүгийн хуульд өөрчлөлт оруулж, УИХ-д худал мэдээлэл өгсөн албан тушаалтан нийтийн албан ажиллах эрхгүй болдог зохицуулалтыг хийхээс өөр аргагүй байна.
Ийм гурван чиглэлээр АН-ын бүлгээс хуулийн төсөл боловсруулж өргөн барихаар боллоо” гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
