Нас барсан жүжигчин бүсгүйтэй холбоотой дуулианд Өмнөд Солонгосын кино од тайлбар өгөв

Өмнөд Солонгосын алдартай жүжигчдийн нэг Ким Сү Хён хоёрдугаар сард амиа хорлосон жүжигчин бүсгүй Ким Сэ Ронтой холбоотой дуулианд тайлбар өгөх хэвлэлийн хурлыг өчигдөр Сөүл хотноо зохион байгууллаа.

37 настай жүжигчин залуу энэ үеэр “Би хийгээгүй зүйлийнхээ төлөө буруудахыг хүлээн зөвшөөрөхгүй” гэж мэдэгджээ.

Сүүлийн гурван долоо хоног орчим хугацаанд Өмнөд Солонгосын нийгмийг доргиож буй дуулианы цөм нь амиа хорлосон жүжигчнийг насанд хүрээгүй байхад Ким Сү Хён дотно харилцаатай байсан, Ким Сү Хёнд тавьсан өрийн дарамтын улмаас эмэгтэй амиа хорлосон гэх хоёр асуудал юм.

Ким Сэ Роныг нас барснаас хойш сар хүрэхгүй хугацааны дараа буюу гуравдугаар сарын 10-ны өдөр нэгэн алдартай YouTube суваг тэдний харилцааны талаар баримт анх дэлгэж байв.

Тухайлбал талийгаачийг 15 настай байхад Ким Сү Хён түүнтэй ойр дотно харилцаатай байсныг дүрс бичлэг, гэрэл зургаар баталсан юм.

Өнгөрсөн долоо хоногт Ким Сэ Роны гэр бүлийг төлөөлдөг өмгөөлөгч 2016 онд буюу жүжигчин бүсгүйг 16 настай байх үеийн тэдний хоорондоо харилцаж байсан чатын түүхийг хэвлэлийн хурлын үеэр дэлгэсэн нь дуулианыг улам хурцатгасан байна.

Ким Сү Хёны харьяалагддаг агентлаг эхэндээ баримтуудыг няцааж байсан бол сүүлд тэднийг 2019-2020 оны үед буюу эмэгтэйг насанд хүрсэн байхад үерхэж байсныг нь хүлээн зөвшөөрсөн юм.

Харин өчигдөр Ким Сү Хён анх удаагаа энэ асуудлаар олон нийтэд ханджээ.

 

“Олон хүний сэтгэлийг зовоосондоо харамсаж байна. Талийгаач амар амгалан нойрсож чадахгүй байгаад би бас харамсаж байна. Талийгаач бид хоёр таван жилийн өмнө буюу “Queen of Tears” цувралыг гарахаас өмнө нэг жил орчим хугацаанд үерхэж байсан. Тухайн үед би үүнийгээ нууж байсан юм. Хүмүүс яагаад үүнийг шүүмжилж, бидний хооронд болсон зүйлд итгэхгүй байгааг би ойлгож байна. Гэхдээ би түүнтэй насанд хүрээгүй байхад нь үерхэж байснаа үгүйсгэж байна. Тэр миний харьяа агентлагийн үзүүлсэн санхүүгийн дарамт шахалтын улмаас ноцтой шийдвэр гаргасан нь бас худлаа” гэж Ким Сү Хён мэдэгджээ.

Тэрбээр цааш нь “Удаан хугацааны эцэст би өнөөдөр энд зогсож байна. Хувийн амьдрал минь хөндөгдөх бүрд би маргааш үүнийг зогсооё гэж боддог байлаа” гэж хэлсэн юм.

 

Нас барсан жүжигчин Ким Сэ Рон

“Queen of Tears”, “My Love from the Star” зэрэг сүүлийн үеийн олон уран бүтээлд дүр бүтээсэн Ким Сү Хён өнөөдөр Өмнөд Солонгосын А зэрэглэлийн жүжигчдийн нэгд тооцогддог.

Тэр бас олон нэр хүндтэй брэндийн нүүр царай болдог. Энэхүү дуулианы улмаас гуравдугаар сарын 17-нд Prada брэнд түүнтэй хамтын ажиллагаагаа зогсоосон юм.

Өмнөд Солонгосын гоо сайхны бүтээгдэхүүний Dinto брэнд бас ижил арга хэмжээ авч байв.

Дуулиантай холбоотойгоор Ким Сү Хёны тоглож буй Disney+ сувгийн нэг цуврал бас уран бүтээлийн үйл ажиллагаагаа түр зогсоожээ.

Ким Сү Хёны өмгөөлөгч өчигдөр бас дуулиан дэгдээсэн Ким Сэ Роны гэр бүл болон Hoverlab нэртэй YouTube сувгийг шүүхэд өгч, 12 тэрбум воны хохирол нэхэмжилж байгааг мэдээлсэн байна.

Эх сурвалж: BBC