Египетийн аялал жуулчлалын зориулалттай шумбагч хөлөг тэнгист живсний улмаас Оросын зургаан иргэний амь үрэгдэв

Өчигдөр Египет улсын Улаан тэнгисийн эргийн ойролцоо аялал жуулчлалын зориулалттай шумбагч хөлөг живэх үеэр Оросын зургаан иргэн амиа алджээ.

Тус улсын нийт 45 жуулчин уг хөлгөөр аялж явсны 39 нь аврагдсаныг Египетийн аялал жуулчлалын төв Хургада хот дахь ОХУ-ын консулын газар мэдээлсэн байна.

Живсэн шумбагч хөлөг нь Sindbad Submarines компанийн өмч бөгөөд 44 хүртэл тооны зорчигчийг 25 метр хүртэл усны гүнд тээвэрлэх чадвартай байжээ.

Ослын шалтгааныг мөрдөн шалгах ажил эхэлснийг Египетийн хэвлэлүүд мэдээлж байна.

Нийслэл Кайр хотоос зүүн өмнө зүгт 460 км зайтай оршдог Хургада хот нь Египетийн аялал жуулчлалын гол төвүүдийн нэг юм.

Албаны эх сурвалжийн өгсөн мэдээллээр бол өнгөрсөн онд тус хотын нисэх буудал есөн сая гаруй зорчигч хүлээж авсан байна.

Улаан тэнгисээр жуулчдыг аялуулдаг олон үйлчилгээ байдаг ч шумбах үйлчилгээг зөвхөн Sindbad компани үзүүлдэг бөгөөд энэ чиглэлээр ажилласан олон жилийн туршлагатай байжээ.

Египет улс аялал жуулчлалын салбараас дотоодын нийт бүтээгдэхүүнийхээ 10 гаруй хувийг бүрдүүлж, хоёр сая орчим хүнийг ажлын байраар хангадаг. Тус улсын зүүн захад оршдог Улаан тэнгисийн эргийн бүс нутаг аялал жуулчлалын чухал хэсэг юм.

Нөгөө талаар Улаан тэнгисийн усанд жуулчид осолдсон тохиолдол сүүлийн жилүүдэд хэд хэдэн удаа гарч байжээ.

Өнгөрсөн оны арваннэгдүгээр сард Хургада хотоос өмнө зүгт оршдог эргийн ойролцоо нэг завь хөмөрсний улмаас дөрвөн хүн амь үрэгдэж, долоон хүн сураггүй алга болж байв.

Долдугаар сард бас нэг хөлөг тэнгисийн усанд живэхэд Францын 20 гаруй жуулчин бүгд аврагдаж байжээ.

2023 онд дарвуулт хөлөг дээр гарсан гал түймрийн үеэр Британийн гурван жуулчин амиа алдаж байв.

Эх сурвалж: AFP