АНУ-Японы тэгш бус холбоотны харилцааг Трамп шүүмжлэв

Ерөнхийлөгч Дональд Трамп тангараг өргөснөөсөө хойш нэг сар, хагасын хугацаанд ажиллахдаа АНУ-ын уламжлалт гадаад бодлогыг эрс өөрчлөх шийдвэрүүдийг гаргаж байгаа.

Хамгийн сүүлд тэр Япон улстай үүсгэсэн холбоотны харилцааг шүүмжилжээ.

“Бид Япон улстай маш сайн харилцаатай. Гэхдээ бид тэднийг хамгаалах үүрэгтэй, хариуд нь тэд биднийг хамгаалах шаардлагагүй гэсэн сонирхолтой гэрээг байгуулсан байдаг. Үүнээс гадна тэд энэ харилцаанаас эдийн засгийн ашиг хүртдэг. Ийм гэрээг хэн анх байгуулсныг би асуумаар байдаг юм” гэж Пүрэв гарагт Трамп ярьсан байна.

Өчигдөр буюу Баасан гарагт Японы засгийн газрын хэвлэлийн төлөөлөгч Ёшимаса Хаяаши үүнд хариу өгчээ. Ингэхдээ тэр хоёр улсын хооронд байгуулагдсан аюулгүй байдлын гэрээнд хүлээсэн үүргээ Вашингтон үргэлжлүүлэн биелүүлнэ гэдэгт Япон улс итгэж байгааг илэрхийлсэн байна.

Одоо АНУ-ын 54,000 орчим цэргийн алба хаагч Японд байрладаг. Үүний ихэнх нь Тайвань арлаас зүүн зүгт оршдог Окинава арлын цэргийн баазад байрладаг юм.

Япон улсын эдийн засаг, худалдаа, аж үйлдвэрийн сайд Ёжи Мутогийн АНУ-д хийх айлчлалын өмнө Трамп ийм зүйл ярьсан нь анхаарал татаж байна.

Трампын засаг захиргаа саяхан АНУ-ын зах зээлд нэвтрэх бүх ган, хөнгөн цагаанд 25 хувийн импортын татвар оноох шийдвэр гаргасан юм.

Мутогийн айлчлалын зорилго нь Япон улсыг энэ татвараас чөлөөлүүлэх юм байна.

Сайд өчигдөр сэтгүүлчидтэй уулзахдаа энэ удаагийн айлчлал “Япон болон АНУ-д харилцан ашигтай байх болно” гэж үзэж байгаагаа илэрхийлжээ.

Трампын ган, хөнгөн цагааны импортын татвар ирэх Лхагва гарагаас хэрэгжиж эхлэх юм.

“Энэхүү татварын агуулга, үр нөлөөг сайтар судлах нь чухал” гэж Муто өчигдөр хэлсэн байна.

Трамп саяхан Аляскад байгалийн хийн хоолой байгуулах их наядын аварга том төсөлд хөрөнгө оруулах сонирхолтой улсуудын тоонд Япон багтаж байгааг зарласан.

Тэгвэл Муто өчигдөр үүнийг няцаажээ.

“Энэ бол үр ашиг, нийлүүлэлт эхлэх хугацаа зэргийг нь засгийн газар болон хувийн хэвшлийнхэн сайтар судлах шаардлагатай асуудал. Бид энэ төслийн талаар илүү дэлгэрэнгүй мэдээллийг АНУ-ын албаны хүмүүсээс сонсоно гэж найдаж байна” гэж сайд хэлсэн юм.

Трамп мөн автомашины импортод 25 хувийн татвар оноохоо амлаад байгаа.

Өнгөрсөн онд АНУ-д экспортолсон Японы бүтээгдэхүүний бараг гуравны нэг нь тээврийн хэрэгсэл байсан юм.

Лхагва гарагт парламентад үг хэлэхдээ ерөнхий сайд Шигэрү Ишиба “Япон улсын АНУ-ын эдийн засагт оруулсан хувь нэмэр их. Тиймээс татварын асуудалд сэтгэл хөдлөлөөр бус логиктой хандахыг бид Вашингтоноос хүсэж байна” гэж мэдэгджээ.

Эх сурвалж: AFP