Apple компани ирэх долоо хоногт шинэ бүтээгдэхүүнээ танилцуулна

Apple компанийн гүйцэтгэх захирал Тим Күк өчигдөр тус компанийн шинэ бүтээгдэхүүнийг ирэх долоо хоногт зарлах талаар Х хуудсандаа мэдээлжээ.

Ингэхдээ тэр долоон секундийн урттай видео дүрсийг хавсаргасан байна. Apple компанийн металл лого гэрэлтэж байгааг уг видео дүрс харуулжээ.

“Манай гэр бүлийн шинэхэн гишүүнтэй танилцахад бэлдээрэй” гэж Күк энэ мэдэгдэлдээ бичсэн юм.

Гэхдээ яг ямар төрлийн бүтээгдэхүүн нь шинэчлэгдэх гэж байгааг тэр дурдаагүй байна.

Зарим шинжээчид Apple компанийг хямд үнэтэй iPhone SE загвараа шинэчилж магадгүй гэсэн таамаг дэвшүүлжээ.

iPhone SE нь анх 2016 онд зах зээлд танилцуулагдаж байсан бөгөөд хамгийн сүүлд 2022 онд шинэчлэгдсэн юм. Уг бүтээгдэхүүний үнэ $429-оос эхэлдэг.

Хиймэл оюуны Apple Intelligence систем одоогоор iPhone-ий сүүлийн загварууд дээр зөвхөн ажиллаж байгаа. Тэгвэл үүнийг өргөжүүлж, нийтэд хүртээлтэй болгох үүднээс iPhone SE шинэ загварыг зах зээлд гаргаж магадгүй гэж үзэж байгаа юм.

Күкийн өчигдрийн мэдэгдлийн дараа Apple компанийн хувьцааны ханш 2 орчим хувиар өссөн байна.

Эх сурвалж: Business Insider