DeepSeek-ийг үүсгэн байгуулагч Лян Вэньфэний тухай

Саяхан АНУ-ын эрх баригчид, хөрөнгө оруулагчид, технологийн аварга компаниудыг цочроосон Хятадын DeepSeek стартап компанийн үүсгэн байгуулагч Лян Вэньфэний тухай мэдээллийг хүргэж байна.

39 настай энэ залуу өнөөдөр Хятадын хиймэл оюуны технологийн хөгжил дэвшлийн нүүр царай болоод байгаа юм.

Нэгдүгээр сарын 20-ны өдөр Хятадын ерөнхий сайд Ли Чяний оролцсон хаалттай хурлын есөн илтгэгчийн нэгээр уригдах хүртлээ Лян олон нийтэд төдийлөн танигдаагүй нэгэн байв.

Өнгөрсөн хоёр жилийн хугацаанд тэр хоёрхон удаа Хятадын хэвлэлд ярилцлага өгч байжээ.

Хятадын төв телевизээр дамжуулсан дээрх хурлын тухай мэдээнд буурал үстэй эрдэмтэд, төрийн өмчит компанийн захирлуудын дунд суух идэр залуу Лян онцгой содон харагдаж байлаа.

DeepSeek компанийн харьцангуй маш хямд зардлаар хөгжүүлсэн хиймэл оюунт чатбот өнгөрсөн долоо хоногт АНУ-ын зах зээлд нэвтэрсэн юм.

Хиймэл оюуны хөгжүүлэлт асар өндөр зардалтай гэж төсөөлдөг байсан хөрөнгө оруулагчдыг энэ бүтээгдэхүүн гайхшируулсны улмаас Даваа гарагт АНУ-ын хөрөнгийн зах зээлд асар том уналт тохиолдсон.

“Хятадын хиймэл оюуны хөгжил үргэлж бусдыг дагах байр сууринд байхгүй. Бид Хятадын хиймэл оюуны технологийн хөгжил АНУ-ынхаас нэгээс хоёр жилээр хоцорч байгаа гэж ихэнхдээ ярьдаг. Гэхдээ жинхэнэ ялгаа нь давтагдашгүй байдал, дуураймал байдлын хооронд байх болно” гэж Лян өнгөрсөн оны долдугаар сард Waves сэтгүүлд өгсөн ярилцлагадаа хэлж байжээ.

Түүний хэлсэн энэ үг Хятадын технологийн салбар хөрөнгө мөнгөөр дутаагүй ч өөртөө итгэх итгэл үнэмшлээр дутаж байгааг илэрхийлсэн юм.

“Өнгөрсөн гучин жилийн хугацаанд манайх (Хятадын технологийн салбар) зөвхөн мөнгөний төлөө явж, инновацыг үл тоомсорлож байсан. Инновац нь зөвхөн бизнест хөтлөгддөггүй, бас сониуч зан, бүтээх хүсэл эрмэлзлийг дагадаг юм” гэж тэр бас хэлж байжээ.

DeepSeek өөрийн Америк өрсөлдөгч OpenAI-аас ялгарч, бүх загваруудаа нээлттэй эх кодтой болгосны шалтгаан Ляны ярьснаас тодорхой харагдаж байна.

“OpenAI хаалттай байсан ч бусдад гүйцэгдэхээс өөрийгөө хамгаалж чадахгүй. Нээлттэй эх нь бизнесийн практик гэхээсээ илүү соёлын практик юм. Үүнийг хийдэг компаниуд зөөлөн хүчээр давамгайлдаг” гэж тэр ярьж байжээ.

Лян бол 1980-1990-ээд оны үед чөлөөт зах зээлд түрүүлж шилжсэн Хятадын өмнөд бүсийн Гуандун мужид өсөж торнисон хүн юм.

Хэдийгээр бизнесийг эрхэмлэдэг хүмүүсээр хүрээлэгдсэн ч эрдэм шинжилгээ, судалгааны ажилд илүү дуртай байснаа тэр ярьсан байдаг.

Тэрбээр 17 настайдаа нэр хүндтэй Зэжяны Их сургуульд элсэж, Электроник, Харилцаа Холбооны инженер мэргэжил эзэмшиж байжээ. 2010 онд Лян тус сургуулийг Мэдээлэл, Харилцаа Холбооны инженерийн мастер зэрэгтэй төгссөн байна.

2015 онд тэр математикийн нарийн төвөгтэй алгоритмыг хөрөнгийн зах зээлийн арилжаанд ашиглах судалгаанд хөрөнгө оруулах зорилгоор хамтарсан сан үүсгэн байгуулалцаж байжээ.

2021 оны эцэс гэхэд тус сангийн хөрөнгийн хэмжээ 100 тэрбум юань ($13.79 тэрбум) хүрсэн байна.

2023 оны дөрөвдүгээр сард Лян өөрийн WeChat хаягаар хиймэл оюуны хөгжүүлэлтэд хөрөнгө оруулах болсныг зарлаж байв.

Үүнээс хойш сарын дараа DeepSeek компани үүсгэн байгуулагджээ.

Тус компанийн ажилтнууд Хятадын шилдэг их сургуулиудын төгсөгчдөөс бүрддэг юм байна.

Эх сурвалж: Reuters