Халзан бүргэд 250 орчим жилийн дараа албан ёсоор АНУ-ын үндэсний шувуу болов

Зул Сарын баярын өмнөх өдөр ерөнхийлөгч Жо Байден цагаан толгойтой, шар хошуутай махчин шувуу болох халзан бүргэдэд хүндэтгэл үзүүлэх тухай хуульд гарын үсэг зурж баталжээ.

Ингэснээр энэ шувуу албан ёсоор АНУ-ын үндэсний бэлгэдэл болж байна.

Халзан бүргэд шувууны дүрс 1782 оноос хойш АНУ-ын төрийн тамганд сийлэгдэж, албан ёсны бичиг баримтууд дээр ашиглагдаж эхэлжээ.

Гэхдээ одоог хүртэл албан ёсны бэлгэдэл болоогүй байсан юм.

Өнгөрсөн долоо хоногт Конгресс дээрх хуулийн төслийг дэмжсэний дараа батлуулахаар ерөнхийлөгч Байденд илгээжээ.

“Бид бараг 250 жил халзан бүргэдийг албан бусаар үндэсний бэлгэдлээ болгож ирсэн юм. Харин одоо энэ шувуу зохих ёсны хүндлэлээ хүртэж, албан ёсны болж байна” гэж Үндэсний Бүргэд Төвийн “Үндэсний Бэлгэдэл Шувуу” санаачилгын тэргүүлэгчдийн нэг Жэйк Дэвис мэдэгдсэн байна.

Гэхдээ энэ шувууг үндэсний бэлгэдэл болгох асуудлаар хүн бүр санал нийлдэггүй байжээ.

Тухайлбал АНУ-ыг үүсгэн байгуулагчдын нэг Бенжамин Фрэнклин халзан бүргэдийг “муу ёс суртахууныг төлөөлдөг шувуу” хэмээн шүүмжилж, үндэсний бэлгэдэл болгохыг эсэргүүцдэг байсан гэнэ.

Бүргэд шувуу нь дэлхийн олон оронд хүч чадал, эр зориг, эрх чөлөө, үхэшгүй мөнхийн бэлгэдэл болдог.

Тэр дундаа халзан бүргэд нь зөвхөн Умард Америк тивийн уугуул шувуу юм байна.

Халзан бүргэдийг үндэсний бэлгэдэл болгох хуулийг энэ шувуу хамгийн олон тоогоор нутагладаг Миннесота мужийн хууль тогтоогчид санаачилжээ.

1940 онд батлагдсан Төрийн Сүлдний тухай хуульд халзан бүргэдийг худалдах, агнахыг хориглосон байдаг.

Нэг үед энэ шувуу устахын ирмэгт хүрээд байсан ч 2009 оноос хойш тоо толгой нь эрс нэмэгдсэн юм байна.

Эх сурвалж: BBC