Энэ сарын 24-нд нутгийн зүүн хагаст цас орж, цасан шуурга шуурч, ихэнх нутгаар хүйтрэн, салхи шуургатай байна

Гэрэл зургийг MPA агентлагийн онцгой зөвшөөрөлтэйгөөр ашиглав

Цаг уур, орчны шинжилгээний газраас 11 дүгээр сарын 18-27-ныг хүртэлх ирэх 10 хоногийн цаг агаарын урьдчилсан төлөвийг мэдээллээ. 

11 дүгээр сарын 18-22-нд ихэнх нутгаар өдөртөө хүйтний эрч бага зэрэг сулрах боловч 23-наас нутгийн баруун хагаст, 24-нд нутгийн зүүн хагаст цас орж, цасан шуурга шуурч, ихэнх нутгаар хүйтэрч, салхи шуургатай байх юм байна. 

Хур тунадас:

• 11 дүгээр сарын 22-нд Алтайн уулархаг нутгаар,
• 11 дүгээр сарын 23-нд баруун аймгуудын ихэнх нутаг, төвийн аймгуудын нутгийн баруун болон хойд хэсгээр,
• 11 дүгээр сарын 24-нд баруун аймгуудын нутгийн зүүн хэсэг, төвийн аймгуудын ихэнх нутаг, говь болон зүүн аймгуудын нутгийн зарим газраар,
• 11 дүгээр сарын 25-нд төв болон говийн аймгуудын нутгийн зүүн хэсэг, зүүн аймгуудын нутгийн зарим газраар, 
• 11 дүгээр сарын 26-нд Халх голын сав газраар цас орж, цасан шуурга шуурна.

Салхи:

• 11 дүгээр сарын 22-нд Алтайн уулархаг нутгаар,
• 11 дүгээр сарын 23-нд нутгийн баруун хагаст,
• 11 дүгээр сарын 24-нд нутгийн зүүн хагаст,
• 11 дүгээр сарын 25-нд нутгийн зарим газраар,
• 11 дүгээр сарын 26-нд говь, тал, хээрийн нутгаар секундэд түр зуур 18-20 метр хүрч ширүүсэж, нутгийн өмнөд хэсгээр шороон шуурга шуурна.

Агаарын температур:

• 11 дүгээр сарын 18-22-нд ихэнх нутгаар өдөртөө бага зэрэг хүйтний эрч суларч Дархадын хотгор, Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө -22...-27 градус, өдөртөө -6...-11 градус,
• Эг, Үүр, Хараа, Ерөө, Туул, Тэрэлж, Хэрлэн, Онон, Улз голын хөндийгөөр шөнөдөө -15....-20 градус, өдөртөө -3....-8 градус,
• Их нууруудын хотгор, говийн бүс нутгийн өмнөд хэсгээр шөнөдөө 0...-5 градус хүйтэн, өдөртөө +1...+6 градус дулаан,
• бусад нутгаар шөнөдөө -6...-11 градус, өдөртөө -2...+3 градус хүйтэн байна.
• 11 дүгээр сарын 22-нд нутгийн баруун хэсгээр, цаашдаа ихэнх нутгаар хүйтэрнэ.

Улаанбаатар хот

Хур тунадас: 11 дүгээр сарын 23-24-нд цас орж, зөөлөн цасан шуурга шуурна. Бусад хугацаанд цас орохгүй. 

Салхи: Ихэнх хугацаанд секундэд 5-10 метр, 24-нд баруун өмнөөс хойш эргэж секундэд 12-14 метр хүрч ширүүснэ.   

Агаарын температур: 18-22-нд өдөртөө хүйтний эрч бага зэрэг суларч шөнөдөө Яармаг-Сонгины орчмоор -9...-14 градус, бусад хэсгээр -4...-9 градус хүйтэн, өдөртөө бүх хэсгээр -2...+3 градус дулаан байна. 23-наас хүйтэрч шөнөдөө Яармаг-Сонгины орчмоор -14...-19 градус, бусад хэсгээр -9...-14 градус, өдөртөө бүх хэсгээр 0...-5 градус хүйтэн байна.