The MongolZ баг "Thunderpick World Championship 2024" тэмцээний хасагдах шатанд шалгарлаа
Counter Strike-2 (CS2) тоглоомын Thunderpick World Championship 2024 тэмцээн Германы Берлин хотод арваннэгдүгээр сарын 3-н хүртэл зохион байгуулагдана.
$850,000 шагналын сантай тус тэмцээний Б хэсэгт манай улсын The MongolZ баг урилгаар оролцож байгаа бөгөөд өчигдөр хоёр удаа тоглолоо.
Эхний тоглолтдоо Америкийн "Cloud9" багтай учраа таарч 0:2 онооны харьцаатай хожсон. Үргэлжлүүлэн хэсгийн хоёр дахь тоглолтоо Их Британи улсын Fnatic багийн эсрэг хийж, хожсоноор тус тэмцээний playoffs буюу хасагдах шатанд шалгарч байна.
Thunderpick World Championship 2024 тэмцээнд нийт 16 баг дөрвөн хэсэгт хуваагдан тоглож байгаа бөгөөд хэсгээ тэргүүлсэн эхний хоёр баг хасагдах шатанд шалгарна. Түүнчлэн хасагдах шатанд шалгарах шөвгийн найман багийн тоглолтын тов одоогоор зарлагдаагүй байгаа.
Гэхдээ хагас шигшээ шатны дөрвөн багийн тоглолтууд ирэх сарын 3-нд зохион байгуулагдах хуваарьтай байна. Мөн тус тэмцээнд түрүүлбэл 500 мянган ам.доллар, хоёрдугаар байр эзэлбэл 150 мянган ам.долларын шагналын санг хүртэнэ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
