“Малын өвөлжөө, хашаа, саравч барих стандарт”-ын төсөл боловсруулж байна

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол оронд төдийгүй дэлхий нийтэд уур амьсгалын өөрчлөлтийн нөлөө ихсэж, цөлжилт, усны хомсдол, хур тунадасны хэмжээ өөрчлөгдөх, цаг агаарын эрс тэс үзэгдлүүдийн давтамж нэмэгдэж байна. 

Үүний нөлөөгөөр бий болсон гамшиг, эрсдэлд тэсвэрлэн үлдэх, хариу арга хэмжээ авах чадвар нь хязгаарлагдмал байгаагийн улмаас хүн ам, тэр дундаа малчид ихээхэн хохирол амсаж болзошгүй байна.

Иймээс Монгол Улсын Их Хурлын 2024 оны дөрөвдүгээр сарын 19-ний хуралдаанаар баталсан Уламжлалт мал аж ахуйд тулгамдаж байгаа уур амьсгалын өөрчлөлтөөс шалтгаалсан сөрөг нөлөөллийг бууруулах тухай хуульд малын өвөлжөө, хашаа, саравч барих, ашиглах талаар байгалийн бүс нутгийн онцлогт тохирсон стандарт боловсруулж, эрх бүхий байгууллагаар батлуулах, хэрэгжилтэд хяналт тавих талаар заасан.

Хуулийн хэрэгжилтийг хангах хүрээнд

• уламжлалт мал аж ахуйг уур амьсгалын өөрчлөлтийн сөрөг нөлөөллөөс хамгаалах
• гамшгийн эрсдэлийг хохирол багатай даван туулах
• малчны эрсдэл даах чадавхыг нэмэгдүүлэх зорилгоор Төрийн нарийн бичгийн даргын тушаалаар байгуулагдсан “Малын өвөлжөө, хашаа, саравч барих стандарт”-ын төсөл боловсруулж, эрх бүхий байгууллагаар батлуулах үүрэг бүхий ажлын хэсэг энэ оны есдүгээр сарын 8-ны өдөр хуралдаж, холбогдох хууль тогтоомж, бусад эрх зүйн хүрээнд салбарын бодлого, чиглэлд нийцүүлэн батлуулахаар ажиллаж байгааг Хүнс, Хөдөө Аж Ахуй, Хөнгөн Үйлдвэрийн Яамнаас мэдээллээ.