Москвагийн эрх баригчид Оросын нутаг дэвсгэрээс YouTube платформд видео бичлэг хуулах (upload) хурдыг зохиомлоор бууруулах гэж байгааг зарлажээ.
Тус улсын парламентын доод танхим болох Төрийн Думын дэд дарга Александр Хинштейн дараа долоо хоногийн сүүлчээс эхлэн хурдыг 70 хувиар бууруулахаар болсныг өчигдөр Телеграм хуудсаараа мэдээлсэн байна.
Үүнийгээ тэр YouTube платформ “Оросын хууль дүрмийг зөрчиж, үл хүндэтгэж байгаатай холбоотой” гэж тайлбарлажээ.
Украинд явуулж буй эзлэн түрэмгийлэх дайныг дэмждэг Оросын хэд хэдэн дуучин, жүжигчний сувгийг YouTube энэ сарын эхээр хаасан юм.
Хинштейн тус платформыг Оросын эсрэг үзлийг дэмжсэн бодлого барьдаг, “Өрнөдийнхнөөс өөр үзэл бодолтой олны танил хүмүүсийн сувгийг хааж хорьдог” гэж шүүмжилжээ.
Эх сурвалж: Radio Free Europe
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!