“Нарантуул” худалдааны төвийн хойд хэсэгт авто зам болон явган хүний зам шинээр барина

Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэлийн засаг дарга Х.Нямбаатар болон холбогдох албаныхан өнөөдөр Баянзүрх дүүргийн 14 дүгээр хороо “Нарантуул” худалдааны төвийн хойно, иргэдийн ярьж заншсанаар "Мангасын ам" гэгддэг хэсэгт ажиллалаа.

“Мангасын ам” гэх энэ газарт гэр хорооллын дахин төлөвлөлтийн хүрээнд ААНБ-ууд газар авч, орон сууц барьсны улмаас хэсэгчилсэн ерөнхий төлөвлөгөөний дагуу төлөвлөлт хийх боломжгүй болжээ.

Иймээс иргэдийн ая тухтай амьдрах орчин нөхцөлийг бүрдүүлэхийн тулд шинээр авто болон явган хүний замыг барихаар шийдвэрлэлээ. Энэ хүрээнд нийслэлийн Газар зохион байгуулалтын албанаас дээр замуудыг барих газрыг чөлөөлөлтийг эхлүүлж, холбоос замын зураг төслийг хийнэ.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Энэ үеэр нийслэлийн Засаг дарга бөгөөд Улаанбаатар хотын Захирагч Х.Нямбаатар холбогдох байгууллагуудад үүрэг даалгавар өглөө. Үүнд:

• Дээрх байршилд явган хүний болон авто зам хийх төлөвлөгөөг төсвийн тодотгол тусгах,
• Тохижилтод анхаарал хандуулж “Нарантуул” худалдааны төвийн удирдлагуудтай зөвшилцөж, зарим хашааг буулгах ажлыг яаралтай гүйцэтгэх,
• Явган болон авто зам засварын ажлыг гүйцэтгэхэд шаардлагатай зураг, төсвийн талаарх танилцуулгыг ирэх даваа гарагийн шуурхай зөвлөгөөнд танилцуулах
• Баянзүрх дүүргийн цагдаагийн хэлтсээс гэмт хэрэг зөрчлөөс урьдчилан сэргийлэх тухай хуулийн дагуу дээрх иргэдийг архины сайн дурын эмчилгээнд хамруулах ажлыг зохион байгуулах зэрэг үүрэг өгсөн юм.

 

Гэрэл зургийг MPA агентлагийн онцгой зөвшөөрөлтэйгөөр ашиглав

Эх сурвалж: НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС