Х.Нямбаатар: Тэр, энэ даргынх, миний ажил мөн, биш гэж ярих хэрэггүй

Гэрэл зургийг MPA агентлагийн онцгой зөвшөөрөлтэйгөөр ашиглав

Улаанбаатар хотын эрчим хүчний одоогийн болон цаашдын нөхцөл байдлын талаар ямар арга хэмжээ авах тухайгаа хотын дарга өнөөдөр болсон хэвлэлийн хурлын үеэр дараах мэдээллийг өгөв.

• Эрчим хүч үйлдвэрлэдэг зарим эх үүсвэрийг нийслэлийн өмчид авч, төр, хувийн хэвшлийн түншлэлээр хөрөнгө оруулалт хийхээр тооцоо, судалгааг эхлүүлсэн. Нийслэлийн мэдлийн нүүрсний ордуудыг түшиглэсэн эрчим хүчний төслүүдийн урьдчилсан яриа хэлэлцээрүүд хийгдэж байна.
   
• Улаанбаатарыг хөгжүүлэхэд хамгийн түрүүнд эрчим хүч, дулаан хангамжийг шийдэх ёстой. Өнгөрсөн жил Сонгинохайрхан уулын орчим 80 мВт-ын чадал нийлүүлэх батарейн станц ашиглалтад орж, ачаалал хуваалцсан.
   
• Сүүлийн үед өмнөд хөршийн эрчим хүчний салбарт сэргээгдэх эрчим хүчний эзлэх хувь, хэмжээ өдрөөс өдөрт нэмэгдэж буй. Парисын конвенцод нэгдсэн дэлхий улс орнууд хүлэмжийн хийг бууруулах чиглэлээр дорвитой ажлууд хийж байна.
   
• Бидний өнөөдрийн гэрээ байгуулж, 11 дүгээр сард ашиглалтад орох Багануурын батарейн станц нь нүүрсхүчлийн хийг хэмнэж, нэмэлт орлого олох боломж буюу карбон кредит цуглуулах алхмуудын нэг болно.
   
• Шөнийн цагаар илүүдэлтэй эрчим хүчийг цуглуулж, өглөө, оройн оргил ачааллын үед төвийн эрчим хүчинд нийлүүлэх горимд ордог станцуудыг байгуулахаар төлөвлөж байгаа. Хамгийн гол асуудал санхүүжилт. Нийслэлээс гаргасан бондыг ногоон зээлийн шугамд оруулж, Олон улсын санхүүгийн корпорацтай удаан хугацаанд яриа хэлэлцээ хийсний дүнд нэн хөнгөлөлттэй зээл болгож байгаа юм. Эргэн төлөлтийг энэхүү бизнесийн орлогоороо төлнө.
   
• Санхүүгийн хямд эх үүсвэрүүд олдвол Улаанбаатарын баруун хойд хэсэгт эрчим хүчний эх үүсвэрүүдийг барихаар судалж байгаа.
   
• Өнөөдрийн байдлаар Монгол Улсын суурилагдсан эрчим хүчний хүчин чадал 1,650мВт.
   
• Налайх дүүргийн нутаг дэвсгэрт байрлах Салхит 50мВт-ын станц эрчим хүчний системд хэвийн нийлүүлж байгаа.
   
• Диспетчерийн Үндэсний Төв болон бусад байгууллагад өдөр, шөнөгүй эрчим хүч нийлүүлэх горим дээр сайн ойлголцож чаддаггүй юм билээ. Эрчим хүчний тариф алдагдалтай байдаг учир шөнийн цагаар эрчим хүч авахгүй байх тохиолдлууд байсан. Энэ асуудлыг шийдэхийн тулд Багануур дүүрэгт Батарей станцыг байгуулж байгаа юм. Өөрөөр хэлбэл сэргээгдэх эрчим хүчний төслүүдийг цогцоор нь төвийн эрчим хүчний системд нийлүүлэх боломжуудыг бий болгож байгаа. Тэр, энэ  даргын ажил, миний ажил мөн, биш гэдэг зүйл байх ёсгүй. 
   
• Хэдийгээр өнгөрсөн жилийн дутагдсан эрчим хүчээ нөхөж буй ч эрчим хүч дутагдахаар байгаа. Салбар хариуцсан яамтай энэхүү дутагдаж буй эрчим хүчийг хэрхэн нөхөх талаар ярилцаж байна.