Монгол Ардын Нам (МАН)-аас нэр дэвшигч Л.Нинжжамц цаг үеийн асуудлаар “Үндэсний мэдээллийн төв”-д өнөөдөр хэвлэлийн бага хурал зохион байгууллаа.
Тэрбээр өөрийн мөрийн хөтөлбөр болон охид, эмэгтэйчүүдэд тулгамдаж буй асуудлын талаар дараах мэдээллийг танилцуулсан юм.
Нэр дэвшигч Л.Нинжжамц "Монгол Улсын иргэд, сонгогчид 126 гишүүнтэй шинэ парламент сонгох түүхэн үйл явдал болох гэж байна.
Миний бие Хан-Уул дүүргийн 12 дугаар тойрогт МАН-аас нэр дэвшиж байгаа.
Өглөөний 07:00-22:00 цаг хүртэл Хан-Уул дүүрэгт багийнхаа хоёр дэвшигчтэй хамт 70 гаруй уулзалтад оролцож, 19,000 иргэнтэй уулзлаа.
Эмэгтэйчүүдийн эрх зөрчигдөж буй асуудлыг төр, засгийн цогц бодлогоор хэрэгжүүлэх зайлшгүй шаардлага гарчээ.
Их, дээд сургууль төгссөн дээд боловсролтой маш олон эмэгтэй байдаг. Гэвч нөгөө талаас мэргэжил эзэмшээгүй эмэгтэйчүүдээ төлөөлж нийгэмд дуу хоолой болох шаардлага үүсжээ.
Гэртээ хүүхдүүдээ хараад сууж байгаа ээж нар 50,000 төгрөг авдаг тухай ярьсан. Цалинтай ээж хөтөлбөрийн намын мөрийн хөтөлбөрт орсон зүйл заалтыг нэмэгдүүлэх талаар олон ээж захиж байна.
Хүүхэд асарна гэдэг үнэгүйдсэн хөдөлмөр болсон байна. Тиймээс эмэгтэйчүүдийг эдийн засгийн эрх чөлөөтэй болгох хүсэлтийг сонгогчид тавьсан.
Мөн нийгмийн оролцооны асуудлыг зайлшгүй яримаар санагдаж байна. Өвчнөөр жишвэл эмэгтэйчүүдийн асуудал ханиадны эмээр эмчлэгдэхгүй. Тэдний сурч боловсрох эрх, цалин, нийгмийн оролцоо зэрэг олон зүйлийг мэс засалд оруулах цаг нь болжээ" гэлээ.
Мөн тэрбээр "Хаалттай хаалга, цоожтой цонхны цаана байгаа эмэгтэйчүүдийн эрхийн төлөө дуугарах тэмцэгч дуу хоолой хэрэгтэй гэдгийг хэлж байсан.
Бид бүгдээрээ гар утасны хүмүүс шиг болж хувирчээ. Сошиал амьдралтай улсууд болчихжээ.
Сонгуулийн сурталчилгааны 10 гаруйхан хоногт нэг нэгнийгээ харлуулсан, эмэгтэйчүүд рүү дайрсан, зураг дүрсийг нь янз янзаар эвлүүлсэн олон бичлэгийг харж байлаа. Эмэгтэй нэр дэвшигчийн хувьд сэтгэл маш их эмзэглэж байна.
Намайг эмэгтэй болохоор сошиалаар дээрэлхэх "Bully" маягийн юмнууд явсан" гэж хэлэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!