Уншиж байна ...

АНУ шинэ хориг зарласны дараа Зөвлөлтийн бүрэлдэхүүнд байсан улсуудын банкууд рублийг доллароор солихоо зогсоожээ

Т.Давааням, ikon.mn
2024 оны 6 сарын 14
iKon.MN
Зураг зураг

Энэ долоо хоногийн Лхагва гарагт АНУ-ын засаг захиргаа Оросын эсрэг эдийн засгийн хориг арга хэмжээгээ өргөжүүлсэн билээ. Үүний улмаас Москвагийн бирж ам.доллар, евро, хонконг долларын арилжаагаа зогсоож, Оросын Төв Банк албан ханш тогтоох аргаа өөрчлөөд байна.

Тэгвэл өчигдөр буюу Пүрэв гарагт хуучин Зөвлөлтийн бүрэлдэхүүнд байсан Казахстан, Тажикистан, Узбекистан, Киргизстан улсуудын арилжааны банкууд рублийг ам.доллар, еврогоор солихоо зогсоосныг Оросын импортын компаниудын төлөөлөл мэдээлжээ.

Тухайлбал Киргизстаны хоёр дахь том банк болох РСК харилцагчдадаа Astrasend, Золотая Корона, Юнистрим, Сбербанк Онлайн зэрэг Оросын мөнгө гуйвуулгын үйлчилгээнүүд техникийн шалтгаанаар зогссоныг мэдэгдсэн байна.

Киргизкоммерцбанк, Компаньон банк бас Юнистримийг зогсоосноо мэдэгдсэн бол Мбанк ханшийн тогтворгүй байдалтай холбогдуулан рублийн арилжаа явуулахгүй байгаагаа мэдээлжээ.

Бай-Тушум, Демирбанк бас ижил шалтгаанаар рубль-долларын солилцоог зогсоосон байна.

Энэ удаагийн хориг арга хэмжээгээр АНУ-ын сангийн яам Оросын “цэрэг зэвсгийн аж үйлдвэрлэл” хэмээх ойлголтод хамааралтай хар жагсаалтыг шинэчилснээр өмнө нь 1,000 орчим хуулийн этгээд бүртгэлтэй байсныг 4,500 орчим болгон өргөжүүлсэн юм.

Ингэснээр Оросын батлан хамгаалах салбарт давхар ашиглагдах боломжтой бараа материал нийлүүлж байсан Хятад, Турк, Арабын Нэгдсэн Эмират, Өмнөд Африкийн Бүгд Найрамдах Улсын компаниуд, банк санхүүгийн байгууллагууд хоёрдогч хоригоор шийтгүүлсэн байна.

 

Эх сурвалж: ТАСС, Интерфакс