Б.Очирбат: Явган хүний замаар суррон, цахилгаан дугуй явуулахгүй байхад олон нийтийн цагдаа нар хяналт тавина

Нийцтэй болон нийцгүй зүйлсийг тусгаарлаж, энэ төрлийн тээврийн хэрэгслийг замын зорчих хэсгээр болон явган хүний замаар явуулахгүйгээр тусад нь зам талбай бэлдэж өгч тусгаарлах шаардлагатай. 

Ингэхгүй бол зам тээврийн осол буурахгүй.

Цаашид осол гэмтлийн тохиолдол улам өсөх хандлагатай байгаа учраас анхаарах, хяналт тавих шаардлагатай. 

Хамгийн гол нь явган зорчигч болон унадаг дугуйн замыг тусгаарлах хэрэгтэй байна. 

Замын хөдөлгөөнд унадаг дугуйтай хэрхэн яаж оролцох талаарх мэдлэг ойлголт өсвөр насны хүүхдүүдийн дунд байхгүй.

16 нас хүрээд мопед унана гэдгээ мэддэггүй, 18 нас хүрээд жолоодох эрхийн үнэмлэх авч мотоцикл, сурроноо унадаг гэдгийг мэдэхгүй хөдөлгөөнд оролцож байна.

Дараагийн 10, 20 жил замын хөдөлгөөнд зөв мэдлэгтэй оролцох оролцогчдыг бэлтгэхийн тулд Ерөнхий Боловсролын Сургуулийн хичээлийн агуулгад зайлшгүй оруулах шаардлагатай. 

Зориулалтын зогсоолтой болгох асуудлыг хөндөхгүй бол болохгүй нь ээ.

Бид нар иргэдээ соёлжуулахгүй бол болохоо больж ээ. Бусдын хөдөлгөөнд саад болж хаа хамаагүй суррон, дугуйгаа орхиод явж байна.

Эдгээрийг зориулалтын зогсоол дээрээс нь аваад хэрэглэдэг, буцаагаад зогсоол дээр нь аваачиж тавьдаг соёлыг бий болгох нь чухал. Зогсоолтой зохион байгуулалттай болъё.

Аппликэйшнээр 5-10 километр цагаар хязгаарлаж хөдөлгөөнд оролцуулахыг түрээслэгч байгууллагуудад хэлж байгаа.

Автомашингүй өдрүүдэд харлаа. Энэ төрлийн тээврийн хэрэгслүүд явганы хөдөлгөөнд маш их саад учруулж байна.

Хөдөлгөөн хязгаарлаж, явган хүний замаар явахгүй, хязгаарлалтын бүсэд орохгүй байх эрх зүйн зохицуулалт нь байсаар байтал явсаар. 

Түрээслэгч байгууллагуудад унтраах чиглэл өгсөн ч ашиг орлогоо бодоод явсан. Албан бус мэдээллээр хэдхэн цагийн дотор эдгээр байгууллага 80 орчим сая төгрөгийн ашиг орлого олсон гэх мэдээлэл бий. Гэхдээ ташаа мэдээлэл ч байж магадгүй, зүгээр тодотгоод хэлье.

Цаашид эрх зүйн зохицуулалтын хүрээнд түр саатуулъя. 

• Гудамж зам талбайд эмх замбараагүй байрлуулсан
• Зорчих хэсэг дээр орхисон, түүнийг шуурхай чөлөөлөөгүй
• Замын хөдөлгөөний дүрмээр түр эсвэл удаан зогсохыг хориглосон газарт зайлшгүй зогсохоос бусад хэлбэрээр суррон, скүүтерээ орхисон үед эдгээрийг түр саатуулъя.

Энэ тохиолдолд тээврийн хэрэгслийг түр саатуулах талаар Цагдаагийн албаны тухай хуульд зааж өгсөн байгаа.

Замын зорчих хэсгүүдэд эдгээр тээврийн хэрэгслийг хаяад явдаг. Бусдын хөдөлгөөнд саад учруулж байна. Үүнийг таслан зогсоох арга хэмжээг зохион байгуулна.

Явган хүний замаар явуулахгүй байх чиглэлд хяналт шалгалт тавина. Үүнд олон нийтийн цагдаа, нийтийн хэв журмын албатай хамтран ажиллах зохион байгуулалтын ажлыг хийнэ. 

Түүнчлэн

• 16 насанд хүрсэн хүн хэрэглэж буй эсэх
• Хамгаалах малгай ашиглаж байгаа эсэх
• Скүүтер, дугуйн дээр давхралдаж яваа асуудал
• Явган хүний замаар түрж гаргуулах зэрэгт хяналт тавина.

Мөн 5-10 километр цаг болгох асуудлыг түрээслэгчдэд хэлж хяналт тавина. Ингэж хяналт тавихад иргэдийн оролцоо чухал гэдгийг Цагдаагийн хурандаа Б.Очирбат хэллээ.