Х.Нямбаатар: Номингийн Баярсайхан үе үеийн нийслэлийн засаг даргад авлига өгч Хан-Уул дүүрэгт олон газар авсан

Нийслэлийн Онцгой комиссын V хурал өчигдөр болж, нийслэлийн хэмжээнд гамшгийн шар түвшин тогтоосон.

Энэ үеэр Нийслэлийн засаг дарга Х.Нямбаатар нэр бүхий хүн сургууль барих газар өгөхгүй байгаа талаар мэдээлэл өгчээ. 

Тэрбээр "Номингийн газар чөлөөлөлтийн захирамжийг нэг дэх өдөр надад оруулж ирж өг. Номингийн захирал Гандигийн гудамжнаас урагшаа Орчлон сургууль хүртэлх замаа тавьчихгүй горойгоод байх юм. 

Өөрсдөө тэнд өчнөөн тэрбум төгрөгийн бизнес хийнэ. Яг үнэндээ энэ газрыг зүгээр аваагүй. Дарга нарт авлига өгч байж авсан. Сургууль барих 7,000 метр квадрат газар өгөх гээд Номингийн Баярсайхан одоо хүртэл байхгүй, алга болсон. 

Өгөхгүй гэдгээ хэлнэ биз, бид авдаг аргаараа авна. Бусад барилгынх нь зөвшөөрлийг өгөхгүй шүү. Сонгуулиар нам нь ялагдсан ч дараагийн хүнд авлига өгөөд том хороолол барина гэвэл андуурч байгаа шүү. 

Номингийн Баярсайханы хувийн бизнес рүү ерөөсөө халдахгүй. Хан-Уул дүүрэгт маш их нягтаршилтай байршилд Номин констракшн олон газар авсан. Үүнийг шударгаар авсан гэж бодохгүй байна. 

Үе үеийн нийслэлийн засаг дарга, газрын албаны хүмүүст хээл хахууль, авлига өгч авсан. Намайг гүжирдэж байна гэвэл шүүхэд өгч болно. Баярсайхан гэдэг хүний бүх төсөл хөтөлбөрт аудит оруул" хэмээн ярилаа.