Зудад өртсөн 11,350 малчин өрхөд ₮7.6 тэрбумын хүмүүнлэгийн тусламжийг Улаан Загалмай Нийгэмлэг хүргэжээ
Зудад өртсөн малчин өрхүүдэд үзүүлсэн тусламжийн талаар Монголын Улаан Загалмай Нийгэмлэг(МУЗН)-ээс өнөөдөр хэвлэлийн хурал зарлаж, мэдээлэл хийлээ.
Энэ тухай ОУУЗУХСНХ-ны Зудын хариу арга хэмжээ хариуцсан зохицуулагч Маниш Тэвани "Энэ жилийн зудын нөхцөл байдал Монголын малчин ардад нэлээд хүндрэлийг авчирлаа. Улмаар тэдний амьжиргааны түвшинд сөргөөр нөлөөлсөн.
Иймд өнгөрсөн оны арваннэгдүгээр сараас хойш үргэлжилсэн зудын гамшигт өртсөн хамгийн эмзэг бүлгийн өрх, иргэдэд ОУУЗУХСНХ болон МУЗН-ээс хүмүүнлэгийн тусламж үзүүлэн хамтран ажиллаж байна.
Хэдийгээр өргөн уудам газар нутагт тархан суурьшиж байгаа ч бид малчин айл өрхүүдэд тусламж хүргэж чадсан.
Тэдний амьжиргаанд нэн шаардлагатай малын эрдэс тэжээлийн багц болон бэлэн мөнгөний тусламжийг үзүүлэн ажиллалаа. Мөн сэтгэл зүйн анхны тусламжийг үзүүлсэн" хэмээв.
Тусламж үзүүлэх шалгуур үзүүлэлт:
- Тусламжид хамрагдах сум нь төмөр болон цагаан зудтай.
- Малын хорогдол гарч эхэлсэн.
- Цасны зузаан болон нягтралаас үүдэн мал бэлчээрлэх боломжгүй болсон.
- Бусад ижил төрлийн хүмүүнлэгийн байгууллага тусламж үзүүлээгүй байх зэрэг шалгуур бий.
Малчин өрхийн үндсэн шалгуур:
- Хонин толгойд шилжүүлснээр 400 хүртэлх малтай малчин өрх.
Нэмэлт шалгуур:
- Ган зуншлага, цас зуд, бэлчээртэй холбоотойгоор отроор өвөлжиж буй
- Жирэмсэн эсвэл хөхүүл ээжтэй гэр бүл
- 16 хүртэлх насны гурав ба түүнээс дээш хүүхэдтэй өрх толгойлсон эцэг, эх
- 16 хүртэлх насны тав ба түүнээс дээш хүүхэдтэй малчин өрх
- Өндөр настан эсвэл хөгжлийн бэрхшээлтэй иргэнтэй малчин өрхийг сонгож хүмүүнлэгийн тусламж үзүүлжээ.
"НҮБ-ын дэргэдэх улс орны хүмүүнлэгийн багтай үйл ажиллагаагаа уялдуулан явуулсан"
МУЗН-ийн ерөнхий нарийн бичгийн дарга Н.Болормаа "Монголын Улаан Загалмай Нийгэмлэг 2023 оны арваннэгдүгээр сарын 8-наас энэ оны тавдугаар сарын 15-ныг дуустал ажилласан байна.
Улаан Загалмай Нийгэмлэг хүмүүнлэгийн тусламжийн ажлыг зохион байгуулахдаа Нэгдсэн Үндэстний Байгууллага (НҮБ)-ын дэргэдэх улс орны хүмүүнлэгийн багтай үйл ажиллагаагаа уялдуулан явуулсан.
Тодруулбал ОУУЗУХСНХ, АНУ-ын олон улсын хөгжлийн агентлаг, НҮБ-ын Хүүхдийн сан, Австралийн Улаан Загалмай Нийгэмлэг, Хятадын Улаан Загалмай Нийгэмлэг, БНСУ-ын Засгийн газар, Серби улсын Засгийн газар, Европын Холбоо зэрэг холбогдох донор орнуудтай хамтран хөрөнгө босгох ажлыг зохион байгууллаа.
Дээр дурдсан шалгуур үзүүлэлтийн дагуу өнөөдрийн байдлаар 11,350 өрхөд 7.6 тэрбум төгрөгийн тусламжийг хүргэж байна. Энэ бол зудын хариу арга хэмжээний хүрээнд МУЗН, ОУУЗУХСНХ-тэй хамтран үзүүлж байгаа бидний гол тусламж юм" хэмээв.
Малчин өрхүүдэд үзүүлсэн тусламжийн дэлгэрэнгүй:
- ОУУЗУХСНХ-ноос 3,000 малчин өрхөд 550 мянган төгрөг, малын эрдэс тэжээлийн багцыг олгосон.
- АНУ-ын Хөгжлийн агентлаг 700 малчин өрхөд тусалсан байна.
- НҮБ-ын Хүн амын сангаас охид, эмэгтэйчүүд чиглэсэн ариун цэврийн багцыг 700 хүнд хүргэсэн.
- Австралийн Засгийн газрын УЗН-ээс 600 айлд бэлэн мөнгө, малын эрдэс тэжээлийн багц хүргэсэн байна.
- Хятадын УЗН-ээс 1,500 айлд хүнсний багцын тусламж болон дулаан хувцас олгосон.
- Хувийн хэвшлээс “Бадрах Энержи” ХХК-тай хамтран ажилласан. Тус компаниас 200 өрхөд бэлэн мөнгө, 200 өрхөд малын эрдэс тэжээлийн багц, 300 өрхөд хүнсний багц олгосон байна.
- Солонгосын Засгийн газраас 675 сая төгрөгийн хандив орж ирсэн. Мөн 700 айлд бэлэн мөнгө, малын эрдэс тэжээлийн багцыг олгосон байна.
- Гадаад Харилцааны Яамны гадаадын болон Монголд ажиллаж байгаа ажилтнууд нэг өдрийнхөө цалинг хандивлаж, 46.4 сая төгрөгөөр 100 малчин өрхөд хүнс, малын эрдэс тэжээлийн багцыг олгосон байна.
- Европын Холбооноос ОУУЗУХСНХ-оор дамжуулан хүмүүнлэгийн тусламж үзүүлсэн. Тодруулбал 1,850 малчин өрхөд 550 мянган төгрөгийн бэлэн мөнгөний тусламж, малын эрдэс тэжээлийн багцыг хүргэж дууссан. Нийтдээ 1.6 тэрбум төгрөгтэй тэнцэх мөнгөн дүнгээр хүмүүнлэгийн тусламжийг Европын Холбоо үзүүлжээ.
- Серби улсын Засгийн газраас 700 өрхөд бэлэн мөнгө болон ариун цэврийн багцын тусламжийг үзүүлсэн. Нийгэм, сэтгэл зүйн дэмжлэг үзүүлэх чиглэлээр сургалтуудыг зохион байгуулахад санхүүгээр дэмжсэн.
Мөн бусад донор орон буюу Тайванийн эдийн засаг, худалдааны төлөөлөгчийн газар бусад хувь хүний үзүүлсэн тусламж 167.5 сая төгрөг, 500 малчин өрхөд малын эрдэс тэжээлийн багц, хүнсний багцын тусламжийг үзүүлж дууслаа хэмээн МУЗН-ийн ерөнхий нарийн бичгийн дарга Н.Болормаа хэлэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
