"Хүмүүс Хамарын хийдэд очиж сакура цэцэглэхийг үзвэл тэр жилдээ азтай, хийморьтой байна гэж сүсэглэдэг"
Дорноговь аймгийн нутагт говийн догшин ноён Хутагт Данзанравжаагийн бүтээсэн Хамарын хийдэд байдаг сакура энэ сарын эхээр цэцэглэж эхэлжээ.
Сакура цэцэглээд хэр уддаг талаар "Хамарын хийдийн тусгай хамгаалалттай газрын захиргаа" ОНӨААТҮГ-ын ахлах мэргэжилтэнтэй утсаар холбогдож, тодруулав.
Тэрбээр "Хамарын хийд орчимд 10 орчим сакура бий. Тавдугаар сарын эхээр эдгээр сакура цэцэглэж эхэлсэн, одоо 10-н гээд цэцэг нь уначихдаг. Дараа жил хүртэл дахиж цэцэглэхгүй.
Хүмүүс Хамарын хийдэд очиж сакура цэцэглэхийг үзвэл тэр жилдээ азтай, хийморьтой байна гэж сүсэглэдэг. Манай газраас сакураг арчилж, услах ажлыг хариуцдаг" гэв.
Харин сакура цэцгийг түүсэн гэх асуудлын тухайд "Сакура цэцгийг хүмүүс түүгээд байдаггүй. Хүүхэд ганц нэг цэцэг түүснийг олон нийтийн сүлжээнд нийтэлсэн бололтой. Түүнээс биш сакурагийн цэцгийг түүж, ямар нэг зүйлд ашиглавал сайн гэсэн шинжлэх ухааны үндэслэлтэй зүйл байхгүй"-г тайлбарлав.
Түүнчлэн Хамарын хийд өнгөрсөн амралтын өдрүүдэд сакура цэцэг үзэх иргэдийн хөлд дарагдсан бөгөөд хог хаяхгүй байхыг уриаллаа.
Тус газраас мэдээлснээр Говийн догшин ноён хутагт Данзанравжаа япон шавьтай байсан бөгөөд XIX зуунд шавь нь ноён хутагтын бясалгал хийж, бүтээлээ туурвиж байсан алдарт газар болох 108 агуйн хажуу жалганд уг сакураг нутгаасаа авчран суулгаж, бэлэглэсэн түүхтэй байна.
"Хамарын хийдийн тусгай хамгаалалттай газрын захиргаа" ОНӨААТҮГ нь энэ сарын эхээр эко бие засах газар байгуулж, нүхэн жорлонгийн устгалыг хийсэн болохыг мэдээллээ.
