ПАРИС 2024: Б.Сэр-Од зургаа дахь олимптоо оролцох боллоо
Данийн Копенхаген хотноо марафоны олимпын эрх олгох сүүлийн тэмцээн боллоо. 1980 оноос хойш үргэлжилж буй Данийн тэмцээнд энэ жил 15,000 гүйгч оролцсон юм.
Тэмцээнд гавьяат тамирчин Б.Сэр-Од 2:19:25 цагийн амжилтаар 14 дүгээр байр эзлэв. Ингэснээр Б.Сэр-Од Хофүгийн марафонд 2:10:11, Осакагийн тэмцээнд 20:10:10 цаг гүйсэн амжилтаар Олон Улсын Хөнгөн Атлетикийн Холбоо (ОУХАХ)-ны чансаагаар 80-д бичигдэж, олимпын эрхээ авлаа.
Олимпын эрхийн болзол хангахын тулд эрчүүд 2:08:10 нормативыг биелүүлэх ёстой. Харин уг амжилтыг үзүүлээгүй бусад гүйгчид олон улсын чансаагаар эрх авдаг билээ.
Б.Сэр-Од гавьяатын хувьд "Афин 2004"-өөс хойш зургаа дахь олимптоо хүч үзэх гэж байна.
Эмэгтэйчүүдийн ангилалд Г.Хишигсайхан 2:28:48 цагийн амжилтаар дөрөвдүгээр байрт шалгарлаа.
Одоогоор манай улс марафон гүйлтээр гурван эрх аваад буй. Тодруулбал эмэгтэйчүүдийн марафонд 2:26:50 цагийн стандартыг Г.Хишигсайхан Токиогийн марафонд 20:26:32, Б.Мөнхзаяа Сөүлийн марафонд 20:24:45 цагийн амжилтаар биелүүлсэн.
Манай марафончид энэ удаагийн тэмцээнд таван эрх авахаар зорьж буй билээ. Энэ сарын 12-нд ОУХАХ эцсийн байдлаар олимпод оролцох тамирчдын нэрсийг баталгаажуулах аж.
