Шинэчилсэн үнэлгээгээр 13 аймгийн 58 суманд төмөр зуд нүүрлэжээ

Гэрэл зургийг MPA агентлагийн онцгой зөвшөөрөлтэйгөөр ашиглав

Зудын үнэлгээг 2024 оны хоёрдугаар сарын 20-ны байдлаар гаргажээ.

Энэ талаар ЦУОШГ-ын Урьдчилан мэдээлэх хэлтсийн дарга Л.Оюунжаргал "Хоёрдугаар сарын 20-ны байдлаар ихэнх нутгаар цасны зузаан нэмэгдэж, 1-51 см болсон байна. Бусад нутгаар 1-9см, хунгарласан, шуурсан газартаа 80-100см цасан бүрхүүлтэй болсон учир зудын үнэлгээг шинэчлэн гаргалаа.

Зудын нөхцөл байдлын үнэлгээг цасны зузаан, нягтыг гол, агаарын температурыг үндэслэн гаргадаг. Цас хатуу, нягт байвал малын бэлчээрт хүндрэл учруулдаг.

Хоёрдугаар сарын 20-ны байдлаар 13 аймгийн 58 суманд мөсөн буюу төмөр зудын, 17 аймгийн 139 суманд цагаан зудын, 18 аймгийн 69 сум, нийслэлийн хоёр дүүрэг цагаанаар зудархуу нөхцөл байдалд оржээ.

Хоёрдугаар сарын 10-ны байдлаар зургаан аймгийн 23 сум төмөр зудтай байсан юм.

Өнгөрсөн шөнө Өвөрхангай, Булган, Сэлэнгэ, Төв аймгийн баруун хойд сумдаар цас орж, 0-1 см цасан бүрхүүл тогтсон байна.

Өнөөдрийн байдлаар цас орж байгаа газар нутаг байхгүй, ихэнх нутгаар хүйтний эрч сулавтар байна.

Маргааш буюу 24-нд ихэнх нутгаар хур тунадас багатай, нутгийн зүүн хэсэгт хүйтний эрч өнөөдрийнхөөс бага зэрэг чангарна.

• 25-нд баруун аймгуудын нутгийн зарим газраар
• 26-нд төв, зүүн аймгуудын нутгийн хойд хэсгээр
• 27-нд зүүн аймгуудын ихэнх нутгаар, говийн аймгуудын зүүн хэсгээр цас орж, цасан шуурга шуурна.
• 29-нд баруун аймгуудын нутгийн хойд хэсгээр цас орно.

Энэ хугацаанд хөдөө орон нутгийг зорих гэж байгаа бол хол замд гарахаа болих зэргээр урьдчилан сэргийлэх арга хэмжээг эртнээс авахыг зөвлөе.

Хоёрдугаар сар дуустал их хүйтрэхгүй ч цас орны дараа бага зэрэг хүйтэрч, цас орохын өмнө дулаарах өдрүүд үргэлжлэхээр байна" хэмээн танилцууллаа.