IBM компани квант компьютерын шинэ чип бүтээснээ танилцууллаа

АНУ-ын технологийн аварга компани IBM өчигдөр буюу Даваа гарагт квант тооцоолуурын цоо шинэ чип бүтээснээ танилцуулжээ.

Энэ нь уламжлалт цахиурт суурилсан чиптэй компьютероос хамаагүй хүчирхэг компьютерын үндэс болох ирээдүйтэй гэж тус компани үзэж байна.

Криоген хөргөлттэй гурван “Heron” чипээс бүрдсэн системээ IBM “Quantum System Two” гэж нэрлэжээ. Ийм системүүдийг модуль болгон хооронд нь нэмж холбосноор асар өндөр хүчин чадалтай квант компьютер бүтээх юм.

IBM-ээс гадна Microsoft, Google, Хятадын Baidu зэрэг компаниуд квантын бит ашигладаг компьютер бүтээхээр өрсөлдөж байгаа. Уламжлалт тэг ба нэг гэсэн хоёр төлөвтэй битээс ялгаатай нь эгэл бөөмсөөр бүтээсэн квант битүүд нэг агшинд тэг ба нэг төлөвийг зэрэг агуулах “superposition” гэх төлөвт байх чадвартай юм.

IBM компани шинэ чип болон тэдгээрийг хооронд нь холбох технологийг бүтээгээд байгаа бөгөөд 2033 онд эдгээрийг ашигласан квант компьютер танилцуулахаар төлөвлөжээ.

“Бид квант компьютерыг шинжлэх ухааны шинэ хил хязгаарыг судлах хэрэгсэл болгох эриний тэргүүн эгнээнд баттай явж байна” гэж IBM компанийн судалгаа хариуцсан захирал Дарио Гил ярьсан байна.

Түүний тайлбарласнаар өнөөдрийн супер компьютеруудын олон сая жил тооцоолох физик, хими, анагаах ухаан, инженерийн бодлогуудыг квантын компьютер хэдхэн минутад гүйцэтгэж чадах гэнэ.

“Үүний хамгийн гайхамшигтай нь сая, тэрбум суперкомпьютерууд хоорондоо холбогдоод ч ирээдүйн энэ машины тооцоолох чадварыг гүйцэхгүй юм” гэж тэр ярьжээ.

Эх сурвалж: Reuters