Мөрийтэй тоглоомын чимээгүй донтолт
Сүүлийн жилүүдэд мөрийтэй тоглоом нь хүчтэй газар авч, улмаар хувь хүн, түүний гэр бүл болоод нийгэмд төрөл бүрийн хор нөлөө үзүүлсээр байна. Гэвч мөрийтэй тоглоомчид үүний үр дагаврыг ухамсарлах бус зугаа цэнгэл, хобби болгон чөлөөт цагаараа тоглодог гэж өөрсдийгөө буруу ойлгосноор маш олон золиосын үндэс суурийг тавьдаг.
Иймд нийгэмд сэрэмжлүүлэг болгох үүднээс мөрийтэй тоглоомын донтолтын хор уршиг болоод түүнийг даван туулах арга замуудыг та бүхэнд хуваалцаж байна.
Тогтвортой ажилтай, гэр бүлтэй, дунд эргэм насны иргэн Х мөрийтэй тоглоомын ертөнцөд татагдан оржээ. Эхэндээ энэ нь энгийн зугаа цэнгэл мэт байсан бөгөөд хааяа казинод зочилдог байв. Гэсэн хэдий ч цаг хугацаа өнгөрөхийн хэрээр мөрийтэй тоглоомд улам илүү шунан татагдах болжээ. Донтолт нь гүнзгийрэх тусам гэртээ болон ажил дээрээ өөрийн үүрэг хариуцлагыг үл тоомсорлож эхлэв.
Тэр казинод олон цагийг өнгөрөөж, удаа дараалсан хожигдлын дараа бүх зүйлийг эргүүлэх том ялалт ирнэ гэдэгт итгэсээр. Энэ байдал нь даамжирч, найз нөхөд, гэр бүлээсээ мөнгө зээлж, дараа төлнө гэж амлаж эхлэв.
Хэдий болих гэж олон удаа оролдсон ч мөрийтэй тоглоомоос салж чадахгүй л байлаа. Эхнэр нь түүний санхүүгийн асуудал болоод донтолтын талаар олж мэдээд түүний гэрлэлт сүйрч эхлэх нь тэр. Х-ийн ажлын гүйцэтгэл ч муудаж, ойр ойрхон ажил тасалж, ажлын бүтээмж муудсанаас болж ажлаасаа халагдахад хүрчээ. Орлогын эх үүсвэрээ алдах зуур өр нь хуримтлагдсаар байсан тул үнэт эдлэлээ зарж, хадгаламжаа шавхаж, туслахыг оролдсон цөөн хэдэн найз нөхдөө ч өөрөөсөө холдуулав.
Ингэж л тэр хэдхэн сарын дотор хайртай бүхнээсээ хагацаж, хэн ч биш нэгэн болон хоцорчээ.
Дээрх түүхээс та бүхэн мөрийтэй тоглоомд донтох нь хувь хүн болон тэдний хайртай хүмүүст ямар хор хөнөөлтэй болохыг ойлгож чадсан болов уу. Донтолтын сорилттой тулгарах үед тусламж, дэмжлэг эрэлхийлэх нь чухал гэдгийг ч мөн үүгээр батлан харуулж байна. Хэрэв та эсвэл таны ойр дотны хэн нэгэн мөрийтэй тоглоомын донтолттой тэмцэж байгаа бол мэргэжлийн хүмүүстэй холбоо барьж, дэмжлэг үзүүлэх нь тэднийг аврах гарц юм.
Мөрийтэй тоглоомд донтохоос урьдчилан сэргийлэх нь мөрийтэй тоглоомтой харилцах харилцаагаа зохицуулах идэвхтэй стратеги хэрэгжүүлэх, амьдралын эрүүл тэнцвэрийг хадгалах явдал юм. Мөрийтэй тоглоомд донтохоос урьдчилан сэргийлэх зарим зөвлөмжийг хүргэж байна.
- Хязгаарыг тогтоох: Мөрийтэй тоглоомын үйл ажиллагаанд оролцохын өмнө санхүүгийн хязгаарлалтыг тогтоо. Мөрийтэй тоглоомд хэр их мөнгө, цаг зарцуулах боломжтойг тодорхойлж, эдгээр хязгаарыг баримтал.
- Оролцдог үйл ажиллагааг төрөлжүүлэх: Төрөл бүрийн үйл ажиллагаанд оролцож, тэнцвэртэй амьдралын хэв маягийг хадгал. Мөрийтэй тоглоомыг чөлөөт цагаа өнгөрөөх цорын ганц зүйл болгохыг бүү зөвшөөр.
- Мэдээлэл авах: Тоглож буй тоглоомуудын магадлал, дүрмийг ойлгоорой. Эрсдэл болон болзошгүй үр дагаврыг мэдэх нь илүү ул суурьтай шийдвэр гаргахад тусална.
- Алдагдлаас зайлсхийх: Бооцооны хэмжээг нэмэгдүүлэх эсвэл илүү олон удаа тоглох замаар алдагдалд орох уруу таталтаас зайлсхий.
- Өөр хувилбар хайх: Мөрийтэй тоглоомоос өөр зугаа цэнгэл, амрах өөр хэлбэрүүдийг судлаарай. Донтолтоос ангид баяр баясгалан, сэтгэл ханамжийг авчрах сонирхолтой зүйлс хорвоогоор дүүрэн бий.
- Өөрийн зан төлөвийг хянах: Мөрийтэй тоглоом сонирхож үзэх явцад таны зан авирт өөрчлөлт орж эхэлбэл донтолтын эхний шат явагдаж буй гэсэн үг. Энэ тохиолдолд яаралтай арга хэмжээ авч, мэргэжлийн хүнд хандаарай.
- Бусдыг оролцуулах: Сайн найз эсвэл гэр бүлийн гишүүнтэйгээ мөрийтэй тоглоомын хязгаарлалтаа хуваалцаарай. Хэн нэгэн таны хязгаарыг мэддэг байх нь гаднын дэмжлэг, хариуцлагатай байдлыг бий болгож чадна.
- Согтууруулах ундаа, мансууруулах бодис хэрэглэхээс зайлсхийх: Бодисын хэрэглээ нь шүүн тунгаах чадварыг бууруулж, хэт их мөрийтэй тоглоом тоглох зэрэг импульсив зан үйлийн магадлалыг нэмэгдүүлдэг. Согтууруулах ундаа, мансууруулах бодис хэрэглэсэн үедээ мөрийтэй тоглоом тоглохоос зайлсхий.
- Өөрийгөө хүмүүжүүлэх: Мөрийтэй тоглоомд донтсон үед илрэх шинж тэмдгүүд болон болзошгүй үр дагаврын талаар олж мэдээрэй. Мэдээлэлтэй байх нь донтолт үүсэхээс урьдчилан сэргийлнэ.
Харамсалтай нь хэдийнээ мөрийтэй тоглоомд донтсон бол дараах нийтлэг шинж тэмдгүүд илэрнэ.
- Өмнө нь тоглосон мөрийтэй тоглоомын талаар бодохоо зогсоож чадахгүй байх, дараагийн удаагийн тоглолтоо төлөвлөх
- Сөрөг үр дагаврууд гарсаар байвч өөрийгөө зогсоож чадахгүй байх, хяналтаа алдах
- Бооцооны дүнг нэмэгдүүлэх
- Мөрийтэй тоглоомын талаар худал хэлэх, дотны хүмүүсээсээ мөрийтэй тоглоомын үйл ажиллагааг нуун дарагдуулах
- Мөрийтэй тоглоомоос улбаалан ажил, гэр бүлийн үүрэг хариуцлагаа биелүүлэхгүй байх
- Мөрийтэй тоглоом тоглохын тулд бусдаас байнга мөнгө зээлэх
- Ааш зан өөрчлөгдөх, хурц ширүүн болох
Тэгвэл энэ донтолтоос хэрхэн ангижрах вэ? Хэрхэн иргэн Х шиг нөхцөл байдалд орохгүй байх вэ? Донтолтыг даван туулах арга замуудыг энд хүргэж байна.
- Донтолтоор мэргэшсэн сэтгэцийн эрүүл мэндийн мэргэжилтэнд хандан эмчилгээ хийлгэх
- Мөрийтэй тоглоомын донтолттой тэмцэх, донтолтоос ангижрахад туслах бүлгүүдэд нэгдэх
- Зарим тохиолдолд эм хэрэглэх
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
