Хүнс комплекс ХХК орон нутгийн иргэдийн хөдөлмөр эрхлэлтийг дэмжинэ

Хөдөөгийн сэргэлт “Нээлттэй Төв аймаг” форумд Хүнс комплекс ХХК орон нутгийн хөдөлмөр эрхлэлтийг дэмжин ажлын байрыг нэмэгдүүлэх зорилгоор Улаанбаатар хотын Хүнсний текник, технологийн коллежтэй хамтран “Ажлын байран дээрх мэргэшүүлэх сургалт”-ыг эхлүүлж тус аймгийн иргэдэд сургалттай холбоотой зөвлөгөө, мэдээлэл өгч оролцлоо.

Монгол улсын Засгийн газраас хэрэгжүүлж буй “Шинэ сэргэлтийн бодлого”-ыг хэрэгжүүлснээр урт хугацаанд эдийн засгийн өсөлт дунджаар 6 хувьд хадгалагдаж, нэг хүнд ногдох үндэсний орлого 2 дахин нэмэгдэж, ажиллах хүчний оролцооны түвшин 65 хувьд хүргэхээр зорин ажиллаж байгаа юм. Хөдөө, орон нутаг руу чиглэсэн ажлууд нь ихэвчлэн мал аж ахуй, газар тариалантай холбоотой байдаг байсан бол энэ удаагийн форумд орон нутагт амьдарч буй иргэдийг таатай ажлын байраар хангах,  эрүүл, боловсролтой, орлоготой байх нь чухал гэдгийг онцлов.

Хүнс комплекс ХХК нь тус аймгийн иргэдийг хамруулсан “Мах боловсруулах үйлдвэрийн ажилтан бэлтгэх” чиглэлээр ажлын байран дээрх мэргэшүүлэх сургалтыг эхлүүлэн ажиллаж байна.