"Улаанбаатар хотод орон сууц худалдан авахад олгох ипотекийн зээлийн дээд хэмжээг ₮200 сая болгож нэмэхээр болсон"

Гэрэл зургийг MPA агентлагийн онцгой зөвшөөрөлтэйгөөр ашиглав

Ирэх оны төсвийн төслийг Сангийн яам өнөөдөр танилцуулав.

Энэ үеэр ипотекийн зээлтэй холбоотойгоор Сангийн сайд Б.Жавхлан хэлэхдээ “Төсөв дээр үндсэндээ 100 тэрбум төгрөгийн багц тавьсан. Төсөв батлагдсаны дараа дэлгэрэнгүй зарлана. Орон нутгийн орон сууцны хүртээмжийг нэмэгдүүлнэ. Ипотекийн зээлийг тултал нь дэмжиж явуулна.

Өчигдөр Монголбанкны Ерөнхийлөгчийн тушаал гарч, орон нутагт орон сууц худалдан авахад олгох ипотекийн зээлийн дээд хэмжээ 100 сая төгрөг байсныг 150 сая төгрөг болгож, Улаанбаатар хотод 150 сая төгрөг байсныг 200 сая төгрөг болгож нэмэгдүүлэхээр болсон” гэлээ.

Үндсэндээ ирэх онд ипотекийн зээл олгох харьцаа нь орон нутагт 60%, хотод 40% байх аж.

Түүнчлэн орон нутаг болон Багануур, Багахангай дүүргүүдэд шилжин суурьшиж, анх удаа орон сууц худалдан авахаар хүсэлтээ гаргасан иргэдэд ипотекийн зээлийн хүүгийн 3 нэгж хувийг эхний гурван жилд төсвөөс санхүүжүүлж, орон сууцны зээлийн урьдчилгаа төлбөрийн 60 хүртэл хувьд баталгаа гаргах арга хэмжээг үргэлжлүүлэх аж.