СЭРЭМЖЛҮҮЛЭГ: Үерийн ус жоншны уурхайд орсноос үүдэн хоёр ажилтан уурхайн гүнд гацжээ

Гэрэл зургийг MPA агентлагийн онцгой зөвшөөрөлтэйгөөр ашиглав

Хэнтий аймгийн Бор-Өндөр сумын нутагт өчигдөр 20:00 цагийн орчимд усархаг бороо орсны улмаас үерийн ус жоншны уурхайн 30-40 орчим метрийн гүнтэй цооног руу урсан оржээ.

Тухайн үед уурхайн гүнд ажиллаж байсан хоёр ажилтан гарч чадаагүй гэх дуудлага Онцгой Байдлын Ерөнхий Газар (ОБЕГ)-т бүртгэгдсэн бөгөөд усыг соруулах ажиллагааг эхлүүлсэн аж.

Хоёр иргэнийг гаргахаар Бор-Өндөр сум дахь Онцгой байдлын хэлтсийн алба хаагчид ажиллаж байна. Мөн ОБЕГ-ын дэргэдэх Уул уурхайн аврах 09 дүгээр ангийн алба хаагчид хүч нэмэгдүүлэн ажиллахаар өнөөдөр 05:20 цагт Хэнтий аймгийн чиглэлд хөдөлжээ. 

Одоогоор хоёр иргэнийг гаргаагүй байгааг ОБЕГ-ын албаны эх сурвалж хэлэв. 

Говийн аймгуудын нутгийн зүүн хэсэг, зүүн аймгуудын ихэнх нутгаар өнөөдөр дуу цахилгаантай аадар бороо орох тул болзошгүй аянга цахилгаан, үер усны аюулаас сэрэмжлэхийг анхаарууллаа. 

Онцгой байдлын газраас дараах сэрэмжлүүлгийг хүргэж байна. 

• Гол, мөрөн нуурын ойролцоо амарч зугаалахдаа сонор, сэрэмжтэй байх,
• Гэр бүл найз нөхөд, хамт олноороо амралт зугаалгаар явахдаа нэгдсэн зохион байгуулалттай, нэгнийгээ бүртгэдэг байх
• Хүүхдийг гол горхи, нуур, цөөрөм рүү ганцааранг нь явуулж тоглуулахгүй байх
• Согтууруулах ундаа хэрэглэсэн үедээ гол усанд орохгүй байх
• Булчин, шөрмөс татах үед гол усанд орохоос татгалзах
• Түргэн урсгалтай гүнзгий голын усанд сэлэхээс зайлсхийх
• Гол горхи, нуурын ус гатлахдаа зориулалтын гарам, гүүрээр гарах
• Голын эрэг дагуу байрласан аюулгүй байдлын сануулга, самбаруудыг анхаарч аюулгүй байдлаа хангах, гол, усны ослоос урьдчилан сэргийлэхийг анхааруулж байна.