Манай улс Чех улсын жуулчдын алхалтын замын тэмдэглэгээг ашиглах эрхтэй боллоо
Монголын явган алхалтын холбоо Чехийн аялагчдын клубтэй хамтран ажиллаж, Чех улсын жуулчдын алхалтын замын тэмдэглэгээг ашиглах эрхийн гэрээнд өчигдөр гарын үсэг зурлаа.
Ингэснээр Богд уулын Дугуй цагааны чиглэлд “Явган алхалтын замын олон улсын тэмдэг тэмдэглэгээний стандарт”-ийг нэвтрүүлэх ажлын эхлэл тавигдаад буй.
Чехийн явган аяллын тэмдэглэгээний стандарт нь бусад өрсөлдөгч стандартуудтай харьцуулбал илүү олон оронд хэрэглэгддэг аялал жуулчлалын замд зориулсан явган аяллын тэмдэглэгээний олон улсын систем юм. Тэмдэг, тэмдэглэгээг байгальд болон хот сууринд ашиглах боломжтой.
Ингэснээр Монгол Улс энэхүү системийг ашигладаг Бразил, Украин, Хорват зэрэг орнуудын нэг болох аж. Уг арга хэмжээний нэг хэсэг нь Монгол дахь алхалтын маршрут болох “Зайсангийн ам, Дугуй цагаан чиглэлийн явган алхалтын зам”-ын тэмдэглэгээнд анхны тэмдэг байршуулсан явдал байв. Монгол Улс 2023 оныг аялал жуулчлалын жил болгон зарласан бөгөөд явган аяллын замуудыг сайтар тохижуулах нь орон нутгийн явган аялагчдыг татах чухал ач холбогдолтойг онцолсон юм.
Бүгд Найрамдах Чех Улсаас Монгол Улсад суух Онц бөгөөд Бүрэн эрхт Элчин сайд Ян Вытопил "Монголын явган аяллын тэмдэглэгээг бий болгоход Чехүүд тусалж байна. Дэлхийн хамгийн эртний дархан цаазат газарт бид өнөөдөр Монголын явган аялагчдын холбоотой гэрээ байгуулсан" хэмээв.
2019 оноос Монголын явган алхалтын холбоо нь монгол орны явган алхалтын зам, маршрутыг тэмдэглэгээжүүлэх, тэр дундаа олон улсын явган алхалтын замын тэмдэг, тэмдэглэгээг нэвтрүүлэх чиглэлд судалгаа хийж, БНЧУ-ын ЭСЯ-аар дамжуулан олон улсын стандартын нарийвчилсан судалгааг хийж, төрийн байгууллагуудтай мэдээлэл солилцож, хамтран ажиллаж иржээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
