Хүүхдүүд 160 гаруй интерактив хичээлийг цахимаар үзэх боломжтой

Боловсролын салбарын хөгжилд сүүлийн жилүүдэд гарсан томоохон өөрчлөлтүүдийн нэг бол яахын аргагүй интерактив хичээл мөн. Интерактив хичээл нь сургалтын үйл явцыг  илүү хүртээмжтэй, үр дүнтэй болгохын зэрэгцээ дижитал эрин үеийнхний сурч хөгжих боломжийг бүрдүүлж байгаа шинэлэг арга барилуудын нэг юм. 

Монгол улсын хувьд боловсролын салбартаа интерактив хичээлийг нэвтрүүлж, чамлахааргүй санг бий болгоод байна. Боловсрол, шинжлэх ухааны яам, НҮБ–ын Хүүхдийн Сан нь “Марчаахай”, “Монгол Контент”, “Номадик Бэйр Гэймс” зэрэг компаниудтай хамтран сургуулийн өмнөх болон ерөнхий боловсролын сурагчдад зориулсан интерактив хичээлийг бүтээх “Цахим аялал” төслийг 3 дахь жилдээ хэрэгжүүлж байна. 

Өнөөдрийн байдлаар medle.mn боловсролын платформ дээр 160 гаруй интерактив хичээл байршиж байгаа бөгөөд нийслэл, сум дүүргийн олон мянган хүүхэд эдгээр хичээлүүдийг үзэж мэдлэгээ бататгасаар байна.

Тэгвэл энэ удаагийн нийтлэлээрээ интерактив хичээл нь ямар давуу боломжуудыг суралцагчид өгдгийг танилцуулъя. 

Интерактив хичээл нь 

• Суралцагчийн оролцоог нэмэгдүүлдэг. Суралцагчийн хичээлд оролцох оролцоо нэмэгдсэнээр анхаарал, сонирхол нь тогтворжиж, сургалтын ерөнхий үр дүн сайжирдаг. 
• Суралцагч төвтэй. Хүүхэд бүрийн сурах чадвар, хурд, хүсэл эрмэлзэл өөр. Уламжлалт заах арга нь хүүхэд бүрийн онцгой сурах арга барилыг төдийлөн хангаж чаддаггүй. Тэгвэл суралцагч өөрийн хурд, ойлгох чадвартаа тохируулан интерактив хичээлээ үзэж  давтах, хоцрогдлоо арилгах, бүрэн ойлголт мэдлэгтэй болох боломжтой. Мөн хаанаас, хэзээ ч, хэн ч үзэж суралцах боломжтой тул хүртээмжтэй, үр дүнтэй сургалтын шинэлэг хэрэглэгдэхүүн болж чаддаг. 
• Бие даан суралцах боломжтой. Суралцагчид тухайн хичээлтэй холбоотой илүү их мэдээллийг өөрийн хүсэл сонирхлоор эрж хайх чөлөөт боломж, мэдээллээ нэгтгэн боловсруулж, дүгнэлт хийх, шүүмжлэх, ойлгосноо бататгах, асуудал шийдвэрлэх боломжийг олгодог. 
• Бодитой. Интерактив хичээлүүдийг боловсруулахдаа бодит амьдрал дээрх жишээгээр агуулгыг тайлбарладаг нь суралцагчид илүү ойр, ойлгомжтой байдаг. Мөн туршиж үзэх туршилтуудыг санал болгож, ойлгосноо хэрэгжүүлэхэд чиглүүлж өгдөг.
• Мэдрэхүйн сургалт. Суралцагчийн олон мэдрэхүйг оролцуулж, хөгжүүлдэг. Ингэснээр хүүхэд хичээлийн агуулгыг хурдан ойлгож, мэдлэгээ удаан хадгалж чаддаг. 
• Технологийн чадварыг нэмэгдүүлдэг. Интерактив хичээлүүд нь суралцагчийг технологи, дижитал хэрэглүүртэй танилцуулж, сургаж, дижитал эрин үед хэрэгтэй чухал ур чадваруудыг хөгжүүлдэг. 

Интерактив хичээлийг зөвхөн суралцагч хүүхэд багачууд төдийгүй эцэг эх, асран хамгаалагчид ч үзэж, хүүхдийнхээ сурах үйл явцыг дэмжих боломжтой. Мөн багш сурган хүмүүжүүлэгчид сургалтын үзүүлэн, материал болгон ашиглах нь нээлттэй. 

“Цахим аялал” интерактив хичээлийн талаар шинэ мэдээ мэдээллийг цаг тухайд нь авч, үзэхийг хүсвэл Цахим аялал Digital adventure хуудсыг дагаарай. 

Нийтлэл бичсэн: “Цахим аялал” төсөл