Баянхонгор аймаг эдийн засгийн тамир тэнхээ, дэд бүтцээрээ хамгийн бага үнэлгээ авчээ

Гэрэл зургийг MPA агентлагийн онцгой зөвшөөрөлтэйгөөр ашиглав

Эдийн засгийн бодлого, өрсөлдөх чадварын судалгааны төвөөс "Аймгуудын өрсөлдөх чадварын тайлан"-гийн үр дүнг 11 дэх жилдээ танилцууллаа. 

Тайлангийн үр дүнгийн талаар судлаач Д.Мөнгөнжигүүр "2021, 2022 оны аймгуудын өрсөлдөх чадварын ерөнхий үнэлгээгээр Дорноговь аймаг тэргүүлсэн хэвээр байна. Эхэнд эрэмбэлэгдсэн зургаан аймгийн хувьд өнгөрсөн жилийнхээс өөрчлөгдөөгүй. Харин Дундговь, Завхан, Булган, Говь-Алтай, Баянхонгор аймаг нь хамгийн бага оноо авч, сүүлд эрэмбэлэгдсэн" гэв. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Өрсөлдөх чадварыг хэмждэг үндсэн дөрвөн бүлгийг тэргүүлсэн болон сүүл мушгисан аймгууд:

• Эдийн засгийн тамир тэнхээгээр Өмнөговь аймаг тэргүүлж, Орхон аймаг удаалж, Баян-Өлгий, Баянхонгор аймаг хамгийн бага үнэлгээ авлаа. 
• Засаглалын үр ашгаар Дорноговь аймаг тэргүүлж, Говьсүмбэр аймаг удаалж, Ховд, Дундговь аймаг сүүл мушгисан байна. 
• Бизнесийн үр ашгаар Дархан-Уул аймаг тэргүүлж, Булган, Говь-Алтай аймаг хамгийн сүүлд эрэмбэлэгджээ. 
• Дэд бүтцийн хувьд Дорноговь аймаг тэргүүлж, Орхон аймаг хоёрдугаарт жагссан бол Баянхонгор, Булган аймаг хамгийн сул үнэлгээ авчээ. 

Аймгуудын өрсөлдөх чадварын дундаж оноо 65 болсон нь өнгөрсөн жилийнхээс зургаан оноогоор буурсан үзүүлэлт юм. Нийт гурван аймгийн өрсөлдөх чадварын оноо нэмэгдсэн бол үлдсэн 18 аймгийн оноо өнгөрсөн оныхтой харьцуулахад өсөөгүй байна. 

Хэдийгээр Булган, Завхан, Говь-Алтай аймаг 18, 19, 20 дугаар байрт жассан ч өмнөх онтой харьцуулахад оноогоо ахиулжээ. 

1. Булган аймаг 11 оноогоор 
2. Завхан аймаг найман оноогоор 
3. Говь-Алтай аймаг нэг оноогоор өрсөлдөх чадвар нь нэмэгдсэн юм. 

Түүнчлэн Орхон аймаг ерөнхий үнэлгээ эрэмбийн хувьд өөрчлөгдөөгүй ч 2.6 оноогоор буурчээ. Үүнд хөдөлмөрийн зах зээлийн бүтээмж, хүн амын амьжиргааны түвшин голчлон нөлөөлжээ. 

Дархан-Уул аймгийн хувьд эрэмбийн байр өөрчлөгдөөгүй ч 10 оноогоор багассан нь нийгмийн тогтолцоо, соёлын үзүүлэлтээс шалтгаалсан байна. 

Өмнөговь аймаг дөрөвдүгээр байрт эрэмбэлэгдсэн нь хэвээр боловч 6.7 оноогоор буурсан нь бизнесийн эрх зүйн үзүүлэлт суларсантай холбоотой аж. 

Хамгийн сүүлд эрэмбэлэгдсэн Дундговь, Завхан, Булган, Говь-Алтай, Баянхонгор аймагт бизнесийн үр ашиг сул байгаа нийтлэг зүйл ажиглагджээ. 

21 аймгийн бизнес эрхлэгчдээс тулгамдаж буй асуудал, тэдгээрийн шийдлийг талаар нээлттэй асууж, судалсан байна. Тэд "Бизнесийн орчныг сайжруулах, төрийн үйлчилгээг ил тод болгох, эрүүл мэндийн үйлчилгээг чанаржуулах, агаар орчны бохирдлыг багасгах" гэсэн асуудлуудыг дэвшүүлсэн байв.