“Эргэж ирэхгүй намар” киноны тусгай үзвэр Westwood Landmark Theatre-д боллоо

Оскарын “Гадаад хэл дээрх шилдэг кино”-нуудаас шилдэг 15 буюу шортлистэд үлдэх киноны нэрс зарлагдахад хэдхэн хоног үлдлээ. 

Оскарт амжилттай оролцох нь дан ганц сайн кинотой байгаад хангалтгүй, харин киноны тухай мэдээлэл, шүүмжүүдийг Академи авардсын шилдгийг шалгаруулах саналын эрхтэй гишүүдэд үзүүлж, анхааралд нь орж, тэдний саналыг авах вэ гэдэг дээр хэрхэн үр дүнтэй ажиллахаас шалтгаалдаг.

Тиймээс “Эргэж ирэхгүй намар” киноны продюсерын багийнхан богино хугацаанд хамгийн үр дүнтэй, shortcut арга болох Академийн авардсын саналын эрхтэй болон эрхгүй аль аль гишүүдээс урьж, Монгол улсаа төлөөлөн өрсөлдөж буй “Эргэж ирэхгүй намар” киноныхоо ТУСГАЙ ҮЗВЭР-ийг ЛОС АНЖЕЛЕС хотын Westwood Landmark Theatre-д өнгөрөгч 12 сарын 16-нд зохион байгуулжээ.

 

Оскарын гадаад хэл дээрх киноны өрсөлдөөн зөвхөн тухайн улсаас гадна Ази, Европ, Өмнөд Америк, Африк гэх мэт тивүүдээрээ мөн өрсөлдөж, хэлэлцдэг нь их сонирхолтой. Энэхүү киног дан ганц Монгол гэж овоглохоос гадна Ази кино гэдэг утгаараа Ази киногоо сонирхохоор Asian American голдуу Академи авардсын гишүүд тусгай үзвэрт хүрэлцэн иржээ.

 

Тэдэн дунд бидний сайн мэдэх Сандра Буллок, Кийну Рийз нарын тоглосон “Хурд” киноны зураглаач, Жет Лигийн тоглосон “Romeo must die” киноны найруулагч ANSRZEJ BARTKOWIAK, Холливүүдэд Азиас төрсөн авьяастнуудыг домог гэгддэг Жэки Чаны тулааны найруулагч, сүүлд MARVELSTUDIO-н “SHENG-CHI: The Legend of the ten rings” киноны тулааны найруулагч ANDY CHENG, Алдарт “Загалмайлсан эцэг” триологийн найруулагч Francis Coppolaе-н хамтрагч “Apocalypse now” киноны Ерөнхий зураач ANGELO GRAHAM, Ази тивээс хамгийн анх Холливүүдийн кинонд тоглосон эмэгтэй жүжигчин KIEU CHINH зэрэг Ази тивийнхээ бахархал болсон Академи авардсын гишүүд хүрэлцэн иржээ.

Тэд маш өндөр сэтгэгдэлтэйгээр киног хүлээн авсан тухай продюсер С.Уран Лос Анжелес хотоос мэдээлэл хүргэсэн юм.

“Эргэж ирэхгүй намар” кино нь 2023 онд Энэтхэг, Канад, Швейцар, Өмнөд Солонгосын олон улсын кино фестивалиудын уралдаант хэсэгт тус тус одоогийн байдлаар шалгараад байгаа бөгөөд Тусгай үзвэрт хүрэлцэн ирсэн Академи авардсын гишүүдийн өндөр сэтгэгдэл зэргийг тооцон үзвэл кино уран бүтээл нь 2023, 2024 онд Байгаль орчин, аялал жуулчлалын яамнаас “Visit Mongolia” уриан дор жил бүр 1 сая гаднын жуулчид хүлээн авах зорилгыг биелүүлэхэд эерэг нөлөөтэй гэдэгт итгэж буй юм.

“Эргэж ирэхгүй намар” киноны хамт олонд баяр хүргэж, амжилт хүсээд, Монгол даяараа дээлийнх нь захыг мушгиад хүлээж байя.