Г.Ирээдүй: Койноор ₮18 тэрбумыг босгочихоод Монгол Улсаас зугтаад явчихсан бүлэг этгээдүүд байна

Гэрэл зургийг MPA агентлагийн онцгой зөвшөөрөлтэйгөөр ашиглав

Виртуал хөрөнгө эзэмшигчдийн эрх ашгийг хамгаалах холбооноос койн, токены талаар өнөөдөр мэдээлэл хийлээ.

Энэхүү холбоо нь койн, токеноос болж эрх нь зөрчигдөж буй иргэдийн дуу хоолой болж хуулийн хүрээнд ажиллах зорилгоор байгуулагдсан аж.

Дэлхий нийтэд мэдээллийн технологийн салбар тэр дундаа блокчэйн систем хурдацтай хөгжиж байна. Монгол Улсад крипто биржүүд ихээр байгуулагдан койн, токеныг мөн их хэмжээгээр гарсан. Нийт 70 гаруй койн, токен гарч Монголын зах зээлээс ₮500 орчим тэрбумыг босгосон. Үүнээс өнөөдрийн байдлаар зах зээлд ₮3 тэрбум хүрэхгүй мөнгө эргэлдэж байгааг тус холбооны үүсгэн байгуулагч Б.Амарсанаа мэдээллийн үеэр онцолсон юм. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Үргэлжлүүлэн тэрбээр "Монголд гурван хүн тутмын нэг нь койнд оролцсон байгаа нь хамрах хүрээ том бөгөөд ямар нэгэн арга хэмжээ авахгүй бол болохгүй байдалд үүсгэчихсэн юм. Манай мэдээллийн технологийн мэргэжилтнүүд блокчэйны датанд анализ хийж, койн, токенууд зах зээлд хэдэн төгрөгөөр нийлүүлэгдсэн, анх IEO захиалга хийснээс хойш нэмж койн нийлүүлсэн эсэхийг шалгана. Дээрээс нь койнуудын төсөл гэгддэг White Paper-ийнхээ дагуу ажилласан эсэхийг шалгаж, нотлох баримт үүсгээд ЦЕГ, Татварын ерөнхий газар, Санхүүгийн зохицуулах хороонд өгч ажиллах болно. 

Бидний гаргасан баримтууд баталгаатай, үндэслэлтэй гэж үзвэл дараагийн шатны хариуцлагын арга хэмжээг төрийн байгууллагуудтай хамтран авч, иргэдийг хохироож, луйвардсан хүмүүст хуулийн хүрээнд арга хэмжээ авхуулна.

Бидний зүгээс койн, токен гаргасан хүмүүс төслийнхөө White Paper-н дагуу ажлаа хийсэн эсэх, бичигдсэнээсээ өөр зүйлд босгосон мөнгөө зарцуулсан бол хариуцлагаа яаж хүлээх, татвараа төлсөн үү гэдгийг шалгаж байгаа. Бидний хийх ажил хуулийн хүрээнд байхыг хэлье. Зарим койн гаргасан хүмүүс монгол улсад таван тэрбум төгрөгийн татвар төлчихсөн жишээ ч байна.

Саяхан гарсан Виртуал хөрөнгийн үйлчилгээ үзүүлэгчийн тухай хууль бол зөвхөн биржийн тухай хууль юм. Яг виртуал хөрөнгийн хууль гараагүй тул яаж ч болно гэж бодож байгаа байх. Монгол Улсад Эрүүгийн тухай хууль, Зар сурталчилгааны тухай хууль гэх мэт бусад хуулиуд бий тул хууль зөрчсөн тохиолдолд арга хэмжээ авхуулахаар ажиллаж байна. Фэйсбүүкт Монгол крипточид нэртэй групп үүсгэсэн. Мөн 80900122 дугаараар бидэнтэй холбогдож баримт мэдээллээ хуваалцах боломжтой" гэв. 

"Нийт гаргасан койны 90 гаруй хувь нь ажлаа хийхгүй байгаа ба зарим нь нууц гүйлгээгээр ашиг олсон байх боломжтой харагдаж байна"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Мэдээллийн технологийн инженер Г.Ирээдүй “Миний хувьд мэдээллийн технологийн инженер мэргэжилтэй, сүүлийн 10 гаруй жил мэдээллийн технологийн салбарт ажиллаж байгаа. Өнгөрсөн жил мэргэшсэн инженерийн зэргээ авсан. Сүүлийн гурван жил крипто салбарыг сонирхож, судалж яваа нэгэн. Та бүхэн мэдэж байгаа бол 2021 оны арваннэгдүгээр сард IZC нэртэй койн гаргаж байсан. Нийт 16 мянга гаруй хүнээс 20.4 тэрбум төгрөгийг хуримтлуулаад, хүмүүсийн блокчэйны талаарх ойлголт дутуу байсан тул буцаан олгосон. Буцаан олгохдоо 500 гаруй сая төгрөгийг давхар илгээж, буцаж орж ирээгүй хүмүүст үлдсэн.

Монголчууд сүүлийн нэг жилийн хугацаанд блокчэйн гэх гоё үгийг өөрсдийн бизнест ихээр ашигласан. Блокчэйны хамгийн том давуу тал нь шударга, нээлттэй, мэдээлэл нь өөрчлөгддөггүй, устдаггүй. Тиймдээ ч их итгэл төрүүлдэг. Энэ итгэлийг ашиглаж, Монголын койн гаргасан хүмүүс асар их мөнгийг хуримтлуулсан юм. 

Блокчэйн систем нь өөрчлөгдөх, устгагдах боломжгүй учраас Монголд гарсан койнуудын хууль бус буюу White Paper дээр дурдагдаагүй койны нийлүүлэлтийг шалгаж байгаа. Шалгаад явахад White Paper-т нь тусгагдаагүй нууц гүйлгээнүүдийг их хийсэн байна. Блокчэйн дээрх гүйлгээнүүдийг мэргэжлийн хүмүүс харж тайлахгүй бол иргэд тайлбарлаж чадахгүй.

Тиймээс манай холбоо хууль бус гүйлгээг шалгаж, Монгол крипточид нэртэй фэйсбүүкийн групптээ баримт нотолгоотой нь тавиад явна. Хууль бус гүйлгээ хийсэн бол энэ нь луйврын шинж чанартай болно.

Тэгэхээр хөрөнгө оруулсан иргэдийг хохирогч гэж бид үзэж байгаа. Энэ иргэдийн төлөө салбараа сайн мэддэг хүмүүс хамтарч ажиллаасай гэж хүсэж байна. Манай хамт олны зүгээс хяналт шалгалтаа эхлүүлсэн. Шалгалт хийгдээд шүүх гэм буруутайг нотлох үед тэр койнуудын нэр ил гарна" гэв.