Уншиж байна ...
Зураг
Зураг
ХУУЧИРСАН МЭДЭЭ: 2022/06/30-НД НИЙТЛЭГДСЭН

Э.Баярбаясгалан: Хоёр сарын хугацаанд найман хүүхэд мориноос унаж, чирэгдэн амиа алдсан. Таван хүүхэд ухаангүй байна

Д.Янжиндулам, ikon.mn
2022 оны 6 сарын 30
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

2022 оны эхний таван сарын байдлаар гэмт хэрэг, зөрчлийн улмаас 941 хүүхэд өртөж хохирчээ. Энэ нь өмнөх оны мөн үеэс 2.4 дахин өссөн үзүүлэлт гэдгийг ЦЕГ-ын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн дарга Э.Баярбаясгалан онцоллоо.

Тэрбээр "Гэмт хэргийн улмаас эхний таван сард 36 хүүхэд нас барж, 316 хүүхэд биедээ гэмтэл авсан.

Мөн цагдаагийн байгууллагад сүүлийн хоёрхон сард хүүхэд мориноос унасан, бэртсэн, чирэгдсэн гэх 13 тохиолдол бүртгэгдсэн. Тэдгээрийн найм нь нас барсан бол тав нь биедээ хүнд гэмтэл авсан буюу эмнэлгийн байгууллагад одоогоор ухаангүй, хэвтэн эмчлүүлж байна.

Эцэг, эхчүүд хүүхдээ зуны амралтаар нь хөдөө хамаатан садан, эмээ өвөөгийнх рүү нь явуулчихдаг. Очсон хүүхэд нь морь сайн унаж сураагүй байж хонинд явахдаа морь унах зэрэг хайхрамжгүй байдал гаргадаг. Энэ байдлаас болж зөвхөн хурдан морины уралдаанаас шалтгаалахгүйгээр мориноос унаж гэмтсэн байна.

"Хоёр сарын хугацаанд гурван хүүхэд өндрөөс унаж нас барж, долоон хүүхэд гэмтсэн"

Мөн сүүлийн хоёр сарын хугацаанд хичээл сургууль амарснаас хойш 10 хүүхэд өндрөөс унаж буюу хад, тагт зэргээс унаж гэмтсэн. Үүний гурав нь нас барсан байгаа юм. Энэ бол эцэг эхчүүдийн хараа хяналтгүй байдалтай шууд холбоотой.

Иймд эцэг эхчүүд хүүхдүүддээ тавих анхаарлаа сайжруулах шаардлагатай. Хүүхдүүддээ учирч болох хор уршиг, эрсдэлийг сайн тайлбарлах, бага насны хүүхдээ дэргэдээ байлгаж, гэрт нь цоожилж явахгүй байхыг хүсье.

"Хүүхэд харж байгаа нэртэй байшин барилга барьж байхдаа том эд зүйлийн ойролцоо хүүхдээ байлгаж байна"

Мөн хугацаанд тогонд цохиулж нас барсан хоёр, эд зүйлд дарагдаж амиа алдсан гурван тохиолдол бүртгэгдсэн.

Хүүхэд харж байгаа нэртэй байшин барилга барьж байхдаа эсвэл өөрийн хийж байгаа ажлын хажуугаар том эд зүйлийн ойролцоо хүүхдээ байлгаж байна. Үүнээс үүдэн барьж байгаа хананд нь, налуулж тавьсан хаалганд нь дарагдах тохиолдлууд бүртгэгдсээр байна.

Иймд томчууд, эцэг эх, асран хамгаалагч нар хүүхдэд учирч болох эрсдэлийг тооцохыг анхааруулж байна" гэлээ.