"Хуш модны самрыг хориглохоос илүүтэйгээр хамгаалах, хяналт тавих менежментийг сайжруулна"

Гэрэл зургийг MPA агентлагийн онцгой зөвшөөрөлтэйгөөр ашиглав

Хуш модны самрын ашиглалт хамгаалалт, менежментийг боловсруулах чиглэлээр зөвлөгөөн зохион байгуулжээ. Тус зөвлөгөөнд Экологийн цагдаагийн алба, Мэргэжлийн хяналтын газар болон бусад холбогдох байгууллагууд санал солилцов. Тодруулбал, хууль эрх зүйн орчин, зүй зохистой ашиглалт, хяналт шалгалтыг хэрхэн сайжруулах, хуш модны самрыг түүж бэлтгэхийг хориглох эсэх, нөхөн сэргээх болон бусад асуудлын хүрээнд хэлэлцсэн байна. 

Дээрх зөвлөгөөнөөс хуш модны самрыг урт хугацаагаар хориглохоос илүүтэйгээр хамгаалах, хяналт тавих менежментийг сайжруулах болон “Ойн дагалт баялгийг хамгаалах, зохистой ашиглах журам”-д өөрчлөлт оруулах санал зөвлөмжийг тус тус гаргав. Түүнчлэн дараах санал, зөвлөмжийг тусгасан байна. Үүнд:

• Самар түүх хугацаа, зөвшөөрлийг тухайн жилийн самрын болц гүйцэд болсон үе, бүс нутаг бүрд тохируулан тогтоох
• Тухайн жилийн самрын ургалт, бэлтгэх боломжтой нөөцийн хэмжээг үнэн зөв бодитой тогтоох
• Ойн нөмрөг дор зориудаар хушны тарьц суулгацаар ойжуулах ажлыг зохион байгуулах
• Хушин ойн байгалийн сэргэн ургалтыг дэмжих, өсвөр модыг хамгаалах ажлыг төлөвлөх
• Гэмтэж доройтсон хушин ойг цаашид яаж хамгаалах талаар арга хэмжээ авч хэрэгжүүлэх
• Хуш модны самар түүх стандартыг боловсруулж батлуулах
• Иргэд олон нийтэд экологийн боловсрол олгох, ухуулан таниулах нөлөөллийн арга хэмжээг авч хэрэгжүүлэх;
• Ойн дагалт баялаг хамгаалах, ашиглах эрх бүхий мэргэжлийн байгууллагууд ахуйн зориулалтаар түүж бэлтгэсэн иргэдийн гар дээрээс самар худалдан авахыг хориглох
• Ойн дагалт баялаг хамгаалах, ашиглах эрхтэй аж ахуйн нэгж байгууллагуудад хуш модны тарьц суулгац ургуулах шаардлага тавих зөвлөмжийг гаргажээ. 

 

Эх сурвалж: Нийслэлийн Байгаль орчны газар