Жеймс, Дюрант нар саналыг тэргүүлж байна
NBA-гийн 2014 оны “Бүх оддын тоглолт” ирэх хоёрдугаар сарын 16-нд АНУ-ын Нью-Орлеан хотод болно.
63 дахь удаагийн “Бүх оддын тоглолт”-ын санал асуулгын эхний дүн гарчээ.
NBA-гийн дөрвөн удаагийн MVP, “Майами Хит” багийн довтлогч Леброн Жеймс, “Оклахома Сити Тандер”-ийн довтлогч Кевин Дюрант нар 600 мянга гаруй хүний санал авч бүсийнхээ тоглогчдыг тэргүүлжээ.
“Дорнод” бүсийн бүх тоглогчдыг “Хаан” Жеймс 609336 хүний саналаар тэргүүлсэн бол “Индиана Пейсерс”-ийн довтлогч Пол Жорж 489335, “Нью-Йорк Никс”-ийн довтлогч Кармело Энтони 424211, “Майами Хит”-ийн хамгаалагч Дуэйн Уэйд 369279, ‘‘Кливлэнд Кавальерс”-ийн холбон тоглогч Кайри Ирвинг 365712 саналаар удаалжээ.
Харин “Өрнөд” бүсийг Кевин Дюрант 607407 оноогоор тэргүүлж, “Лос-Анжелес Лейкерс”-ийн хамгаалагч Коби Брайант 501215, “Лос-Анжелес Клипперз”-ийн Крис Пол 393313, “Голден Стейт Уорриорз”-ын холбон тоглогч Стефан Карри 327449, “Хыостон Рокитс”-ийн төвийн тоглогч Дуайт Ховард 295120 саналаар эхний тавд бичигдсэн байна.
“Бүх оддын тоглолт”-ын санал асуулга нэгдүгээр сарын 20-нд дуусах бөгөөд бүс бүсээ шалгарсан таван тоглогч шууд оролцох эрхтэй болно.
Харин сэлгээний тоглогчдыг NBA-гийн 30 багийн дасгалжуулагч сонгох юм.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
