Монгол Улсын их сургуулийн Социологи, нийгмийн ажлын тэнхимийн 30 жилийн ой энэ жил тохиож буй.
Тус ойн хүрээнд зохион байгуулагдаж буй OPEN MIND MONGOLIA 2021: “Supporting social well-being during and after Covid-19” олон улсын эрдэм шинжилгээний хурал өнөөдөр боллоо.
Олон улсын эрдэм шинжилгээний бага хурлын нэгдсэн хуралдаанд 2003-2004 онд Америкийн Социологийн холбооны ерөнхийлөгч, 2010-2014 онд Олон улсын социологийн холбооны ерөнхийлөгч асан, АНУ-ын Бөрклэйн их сургуулийн профессор Майкл Бюровэй, Францын Социологийн холбооны ерөнхийлөгч, социологич хатагтай Муриэл Дармон, мөн АНУ-ын тэргүүлэх социологичдын нэг, Бөрклейн их сургуулийн эмерит профессор, хатагтай Эрли Хокчайлд, МУИС-ийн Нийгмийн судалгааны хүрээлэнгийн захирал, профессор ноён О.Мөнхбат нар нийгмийн тэгш бус байдал, КОВИД-19 цар тахлын нөлөө, социологийн судалгааны онцлог, харах өнцөг, хөгжлийн сэдвээр илтгэл хэлэлцүүлэв.
Социологи, нийгмийн ажлын тэнхимийн 30 жилийн ойд зориулсан тус олон улсын эрдэм шинжилгээний бага хурал Социологи ба Буддист нийгмийн ажил гэсэн хоёр үндсэн хэсэгтэй зохион байгуулагдсан юм.
Социологийн салбар хуралдаанд АНУ, Франц, ОХУ, ХБНГУ, Польш, Япон, Энэтхэг болон үндэсний эрдэмтэд КОВИД-19 цар тахлын нөлөөлөл улс орнуудад хэрхэн тусч байгааг шүүн тунгаасан илтгэл хэлэлцүүлсэн юм.
МУИС-ийн Социологи, Нийгмийн ажлын тэнхим ОХУ, АНУ, Герман, Франц, Хятад, Турк, Белги, Монгол Улсад судалгаа, эрдэм шинжилгээний ажил хийж, мэргэжил дээшлүүлсэн, хамгаалсан доктор, дэд профессор, профессор буюу нийт 16 багш ажиллаж байна.