"Химийн хичээлийн шалгалтын үед материалын зургийг нууцаар авсан шалгуулагчийн оноог хүчингүйд тооцсон"
Элсэлтийн ерөнхий шалгалтын зохион байгуулалт болон сэдэв задарсан эсэхэд Боловсролын үнэлгээний төвийн захирал Л.Ганбат дараах тайлбарыг хийлээ.
Тэрбээр "Хими болон Нийгэм судлалын хичээлийн даалгавар задарсан гэх мэдээлэл олон нийтийн сүлжээнд гарсан. Үүнд хяналт шалгалт хийсэн. Ямарваа хичээлийн даалгавар задрах боломж байдаггүй. Өмнө нь ч задарч байгаагүй.
Шалгалтын журам гэж бий. Авч орохыг хориглосон эд зүйлсийн жагсаалт ч гарсан байдаг. Тухайлбал, гар утас, тооны машин, томъёоны хураангуй зэрэг хуулах оролдлого хийж болзошгүй, бусдад саад учруулах магадлалтай зүйлсийг оруулахыг хориглодог.
Шалгалтын байрны гадна шалгуулагчдаас нийт 16,200 ширхэг гар утсыг бүртгэлжүүлэн авч, байрны гадаа үлдээсэн байгаа. Гэвч хоёр утасныхаа нэгийг шалгалтын байрны гадаа үлдээж, нэгийг нь биедээ нуун авч орсон тохиолдол хэд хэд гарлаа.
Үүний улмаас хичээлийн даалгавар задарсан гэх мэдээлэл тарсан.
Химийн хичээлийн шалгалт 10:00 цагт эхэлсэн. Гэтэл нэг шалгуулагч гар утсаа авч ороод шалгалт эхэлснээс хойш буюу 10:57 цагт материалын зургийг авч, бусдаас тусламж гуйсан нь тогтоогдсон. Үйлдлийг тухайн үед нь илрүүлэн журмын дагуу тухайн шалгуулагчийн оноог хүчингүйд тооцож, арга хэмжээ авсан.
Түүнчлэн Нийгэм судлалын хичээлийн шалгалтын материалыг Бямбаа багш гэх фэйсбүүкийн хэрэглэгч олон нийтийн сүлжээнд тараасан. Үүнийг шалгахад Бямбаа багш гэгч нь шалгалт дууссаны дараа материалын зургийг тарааснаа хүлээн зөвшөөрсөн. Учир нь түүний шавь шалгалтын материалыг хураалгалгүй авч гарч, багшдаа өгсөн нь тогтоогдсон. Шалгалтын дэг зөрчсөн тул журмын дагуу холбогдох арга хэмжээг авна.
Мөн амар хялбар аргаар өндөр оноо авах гэсэн оролдлогууд гарлаа.
Жишээлбэл, 4 болон 39 дүгээр сургууль, Баян-Өлзий, Завхан зэрэг аймагт гар утсаа авч орсон, ашиглахыг завдсан. Баян-Өлгий аймагт багш нь зохион байгуулалттайгаар тусалсан тохиолдол гарсан бол Завхан аймаг болон Улаанбаатар хотод өөрийнхөө оронд өөр хүн шалгалтад оруулахыг оролдсон.
ЭЕШ бол уралдаант шалгалт. Хэн сайн бэлдсэн нь өндөр амжилт үзүүлэх боломж бий учир ёс зүйг баримтлах ёстой. Бид журам зөрчсөн, ёс зүйгүй авир гаргасан багш нар болон шалгуулагч нарт тухай бүрт нь арга хэмжээ авснаа албан ёсоор хэлье" гэсэн юм.
ВИДЕО:
