Уншиж байна ...
Зураг
Зураг
ХУУЧИРСАН МЭДЭЭ: 2021/04/02-НД НИЙТЛЭГДСЭН

Т.Батцэцэг: Монгол Улс, ОХУ-ын Ерөнхийлөгч нар өнөөдөр утсаар ярина. Энэ үеэр тодорхой тохиролцоонуудад хүрнэ гэдэгт итгэлтэй байна

А.Намуун, iKon.mn
2021 оны 4 сарын 2
iKon.MN
Зураг зураг

ГХЯ-ны Хөрш орнуудын газрын захирал Т.Батцэцэгээс Монгол-Орос, Монгол-Хятадын харилцааны цаг үеийн зарим асуудлаар тодрууллаа.

- ОХУ-ын Ерөнхийлөгч В.Путин манай Ерөнхийлөгч Х.Баттулгатай биечлэн уулзахаас татгалзсан, Оросын тал хүлээж авахгүй байгаа зэрэг мэдээллүүд гараад байна. Энэ хэр үндэслэлтэй мэдээлэл вэ? 

- Монгол, Оросын хооронд дипломат харилцаа тогтоосны 100 жилийн ойг тэмдэглэн өнгөрүүлэх ажлыг Монгол Улсын Ерөнхийлөгчийн ОХУ-д хийх төрийн айлчлалаар эхлүүлэх саналыг манай талаас тавьсан. Энэ дагуу Ерөнхийлөгчийн ОХУ-д хийх айлчлалын товын талаар Оросын талтай ярилцаж байгаа. Хоёр улсын цар тахлын нөхцөл байдлаас шалтгаалж, айлчлалыг одоогоор хэрэгжүүлэх нөхцөл бүрдээгүй байгаа учраас өнөөдөр хоёр улсын Ерөнхийлөгч нар утсаар ярина. Энэ үеэр харилцаа, хамтын ажиллагааг хөгжүүлэх талаар тодорхой тохиролцоонуудад хүрнэ гэдэгт итгэлтэй байна. 

- Тэгэхээр энэ айлчлалыг хэрэгжүүлэхээр цаашид ч ярилцана гэсэн үг үү. 

- Энэ онд хоёр улсын хооронд дээд, өндөр түвшний харилцан айлчлал хэрэгжүүлэх талаар бид Оросын талтай үргэлжүүлэн ярилцах болно. Хүрсэн тодорхой ойлголцол ч бий. 

- Монгол, Хятадын хилийн боомтуудын үйл ажиллагаа доголдсон нь аж ахуйн нэгж, иргэдийг багагүй бухимдуулж байна. Энэ асуудлыг шийдвэрлэхээр хэрхэн ажиллаж байна вэ?

- Манай улсын цар тахлын өнөөгийн нөхцөл байдалтай холбогдуулан Монгол, Хятадын зарим хилийн боомт дахь халдвар хамгааллын арга хэмжээг чангатгаж буйгаа Хятадын талаас мэдээлсэн. Үүний улмаас Замын-Үүд, Гашуунсухайт, Шивээхүрэн боомтуудаар ачаа бараа нэвтрүүлэх хэмжээ сүүлийн өдрүүдэд буурсан. Боомтуудын үйл ажиллагааг хэвийн болгох үүднээс манай холбогдох байгууллагууд хот хооронд зорчих хөдөлгөөнд тавих хяналтыг сайжруулах, жолооч нарыг дархлаажуулах зэрэг өргөн хүрээний арга хэмжээг авч буйг бид Хятадын талд мэдээлж, боомтуудын үйл ажиллагааг аль болох эрт хэвийн болгох саналыг тавьж ярилцаж байна.

Үүний дүнд Замын-Үүд боомтын тухайд, Хятадын тал урьдчилсан байдлаар 4 дүгээр сарын 7-ны өдрөөс эхлэн манай талаас тээврийн хэрэгсэл хүлээн авах бэлтгэл хангаж буйгаа мэдээлээд байна. Боомтуудад үүссэн хүндрэлүүд нь цэвэр цар тахлаас үүдэлтэй бөгөөд нөхцөл байдал сайжирснаар аажмаар хэвийн байдалд шилжинэ гэдгийг Хятадын талаас онцолж байгаа. 

- Гадаад харилцааны сайд Б.Батцэцэг ойрын хугацаанд хөрш орнуудаас вакцин авах талаар  мэдээлсэн. Энэ ажлын явц ямар байна вэ?

- БНХАУ-ын Засгийн газраас 300,000 тун вакцин буцалтгүй тусламжаар нийлүүлснийг та бүхэн мэдэж байгаа. Тус улсад үйлдвэрлэсэн вакциныг худалдан авах талаар идэвхтэй яриа хэлэлцээ хийсний дүнд нийт 900,000 тун вакцины гэрээ байгуулсан, эхний ээлжийн 300,000 тун вакциныг өнөөдөр орой хүлээн авна.

Үлдсэн 600,000 тун вакциныг 4 дүгээр сарын дунд гэхэд хүлээн авахаар ярилцаж байна. Түүнчлэн Оросын шууд хөрөнгө оруулалтын сантай 1 сая тун Спутник V вакцин худалдан авах гэрээг өчигдөр байгуулсан, яаралтай татан авахаар ажиллаж байна.