Банкны салбарт хийх гэж буй гол өөрчлөлтүүд

Гэрэл зургийг MPA.mn

Банкны салбарт реформ хийх талаар Ерөнхий сайд, УИХ-ын дарга удаа дараа мэдэгдсэн. Тэгвэл Цар тахалтай холбоотой эдийн засгийг дэмжих УИХ-ын тогтоолд багтаж буй банкны салбарын дунд хугацааны шинэчлэлийн хүрээнд хэд хэдэн өөрчлөлт хийхээр төлөвлөжээ.  

Яг ямар шинэчлэлүүдийг хийх гэж байгааг Монголбанкны ерөнхий эдийн засагч Д.Ган-Очирын тайлбарласнаар багцлан хүргэе.

1. Зарим банкны өөрийн хөрөнгийг нэмэгдүүлэхтэй холбоотой асуудлыг дунд хугацаанд шат дараатай шийднэ.  

2. Банкны эзэмшигч цөөн хүн байгаагаас санхүүгийн үндсэн үйл ажиллагаанаас гадна өөр бизнес рүү хальж орох, тэр нь банкны салбарт эрсдэл бий болгох зэрэг сөрөг үр дагавар ихтэй байгаа тул хувь эзэмшигчдийнх нь тоог нэмэхийг зорьж байна. Нэг хүн 20 хувиас дээш хувьцаа эзэмшихгүй байх нөхцөлийг бүрдүүлнэ. Банкуудыг нээлттэй хувьцаат компани болгох буюу хөрөнгийн биржээр дамжуулан хувьцаагаа гаргах замаар бусад эзэмшигчийг оруулах боломжийг нээж өгч байгаа. Засаглал дээр олон хүний хяналт орж ирснээр бүх үйл ажиллагаа нээлттэй, тунгалаг болох давуу талтай.

3. Олон улсын банкны салбарт шалгуур тогтоодог Баззлын хорооны стандарт шаардлагыг нэвтрүүлж, нийцүүлнэ. Үүний тулд Банкны тухай хульд холбогдох өөрчлөлтүүдийг тусгах гэж байна.

4. Нягтлан бодох олон улсын стандартыг нэвтрүүлэх зохицуулалтуудыг хийж байна гэлээ. 

Холбогдох хуулиудад өөрчлөлтүүд оруулж байгаа юм байна. Эдгээр өөрчлөлтийг хийснээр банкны салбарт итгэх иргэдийн итгэл нэмэгдэнэ. Мөн өөрийн хөрөнгөтэй болж, олон улсын стандарт хангаад засаглалын хувьд эрүүл болбол санхүүгийн зуучлалыг илүү үр ашигтай болгоно гэж тооцсон байна.