ФАТФ манай улсыг Саарал жагсаалтад оруулалгүйгээр мэдэгдэл гаргах гэж буй талаар УИХ-ын Хэвлэл мэдээлэл, олон нийттэй харилцах хэлтэс албан ёсны хуудсаараа дамжуулан мэдээлжээ.
Үүнд "Монгол Улс улс төрийн өндөр түвшний мэдэгдэл гаргаж, ФАТФ-тай хамтран ажиллах эрмэлзлээ илэрхийлж, тайлангийн зөвлөмжид заасан ажлуудыг хэрэгжүүлж байгааг тэмдэглэжээ" хэмээн бичсэн байна.
“Улс төрийн өндөр түвшний” гэдэг нь УИХ-ын дарга Г.Занданшатарын ФАТФ-т илгээсэн захидал, эрсдлээс сэргийлэх талаар гаргаж буй хүчин чармайлтыг хэлж байгаа аж. Улмаар нэмэлт ажлын зөвлөмж гаргахаар болж байгаа тухай мөн бичээд УИХ-ын даргын аравдугаар сарын 7-нд ФАТФ-т илгээсэн захидлыг хавсаргажээ.
ФАТФ буюу Мөнгө угаахтай тэмцэх санхүүгийн арга хэмжээ авах олон улсын байгууллагын ээлжит хурал Франц улсын нийслэл Парис хотноо энэ сарын 13-нд эхэлсэн бөгөөд өнөөдөр өндөрлөж буй. Тус хурлаас гарсан улс орнуудын талаарх шийдвэрийг өнөөдөр танилцуулах юм. Тиймээс Монгол Улсыг "Саарал жагсаалт"-д оруулсан эсэх албан ёсны эцсийн шийдвэрийг ФАТФ-аас өнөөдөр танилцуулна гэдгийг албаны хүмүүс мэдэгдээд буй.