Apple компанийг дэлхийн хамгийн өндөр үнэ цэнэтэй компани болтол нь 20 гаруй жил ажилласан Британийн дизайнер Сэр Жони Айв хувийн бизнесээ эхлүүлэхээр явж байгаагаа өчигдөр зарлажээ.
Mac, iPod, iPhone зэрэг бүтээгдэхүүнүүдийн дизайныг бүтээсэн Айв энэ оны сүүлээр Apple-аас гарч, LoveFrom нэртэй хувийн дизайны компаниа ажиллуулахаар болсон байна.
Түүний компанийн анхны үйлчлүүлэгч нь Apple байх ажээ.
“Бараг 30 орчим жилийн хугацаанд тоо томшгүй олон төсөл дээр ажилласны дараа цаашдаа хэнээс ч хамаарахгүйгээр тасралтгүй ажиллаж чадах дизайны баг, үйл ажиллагаа, соёлыг Apple-д бий болгосон нь миний хамгийн том бахархал” гэж Жони Айв ярьсан байна.
Шинээр байгуулагдах LoveFrom компанийн тухай мэдээлэл хомс байгаа ч Калифорнид үйл ажиллагаагаа явуулж, өмсөж зүүдэг (wearable) бүтээгдэхүүний салбарт ажиллах тухай яриа гарсан байна.
Жони Айвтай хамт Apple-д ажиллаж байгаа Марк Ньюсон шинэ бизнест нь хамтрахаар болжээ.
Айв 1996 онд Apple-ийн дизайны студийн захирлаар ажиллаж эхэлсэн юм.
Тухайн үед компани санхүүгийн хямралд орж, олон ажлын байраа цомхотгож байв. Айвын дизайнаар бүтээсэн iMac 1998 онд, iPod 2001 онд зах зээлд гарсны дараа Apple-д эргэлтийн үе ирсэн юм.
Улмаар 2004 онд iPod Mini, 2007 онд iPhone, 2008 онд MacBook Air, 2010 онд iPad, 2015 онд Apple Watch, 2016 онд AirPods бүтээгдэхүүнүүд гарахад Айвын гар, оюун оролцсон байдаг.
Стив Жобс нэг удаа “Хэрвээ Apple-д миний оюун санааны түнш байгаа бол тэр нь Жони” гэж хэлж байжээ.
Айв хамгийн сүүлд Apple компанийн дугуй хэлбэртэй, шилэн хийцтэй Apple Park шинэ оффисын барилгыг босгоход оролцсон байна.
2012 онд Британийн хатан хаан түүнд хүлэг баатрын хэргэм хүртээж байв. Айвын хариуцаж байсан чиг үүргийг хоёр хувааж, үйлдвэрлэлийн дизайны багийг Эванс Ханки, интерфэйсийн дизайны багийг Алан Дай нар удирдахаар болсныг Apple зарлажээ.
Эх сурвалж: BBC
Америк доллар
