Уншиж байна ...
ХУУЧИРСАН МЭДЭЭ: 2019/04/18-НД НИЙТЛЭГДСЭН

Хашаа, байшингаа даатгуулахад иргэд юуг анхаарах ёстой вэ?

ikon.mn
2019 оны 4 сарын 18
iKon.MN
Зураг зураг

Санхүүгийн зохицуулах хороо аливаа даатгалд хамрагдаж байгаа иргэдийн эрх ашиг, тэдний өмнө даатгалын компаниудын хүлээсэн үүрэг, хариуцлагад хяналт тавьж ажилладаг. Тиймээс иргэд орон сууц, хашаа байшин зэрэг үл хөдлөх хөрөнгө болон бусад даатгалын бүтээгдэхүүн, үйлчилгээ эрхлэгчдийн үйл ажиллагаатай холбоотой аливаа гомдол маргааныг Санхүүгийн зохицуулах хороонд хандаж шийдвэрлүүлэх боломжтой.

Хашаа байшингаа даатгуулах тохиолдолд иргэд юуг анхаарах ёстой талаар иргэдэд зөвлөж байна. Учир нь иргэд даатгалын компаниар үйлчлүүлэхдээ мэдлэг мэдээлэлгүйгээс болж хохирох эрсдэл үүсэж болно. Тэгвэл эд хөрөнгө, цаг хугацаа, санхүүгийн хувьд эрсдлээс урьдчилан сэргийлэхийн тулд тухайн даатгалын компаниас бүрэн мэдээлэл авч, гэрээний нөхцөлтэй сайтар танилцан, баталгаажуулах хэрэгтэй. 

  1. Хашаа байшингаа даатгуулах даатгалын компаниа сонгоно. Уг даатгалын компани нь Санхүүгийн зохицуулах хорооноос тусгай зөвшөөрөлтэй эсэхийг сайтар нягтлаарай.
  2. Сонгосон компани дээрээ очиж “Хашаа байшингийн даатгалын нөхцөл заавар”, даатгалын гэрээнд заасан нөхцөлийг уншиж танилцана.
  3. Хашаа байшингаа хэдэн төгрөгөөр үнэлж даатгуулах талаар өөрөө сонголтоо хийнэ. Та аль болох зах зээлийн үнээр нь даатгуулбал учирсан аливаа хохирол бүрэн төлөгдөх боломжтой болно. Харин бодит үнээс 2-3 дахин дээгүүр үнэлж даатгуулбал даатгалын гэрээ хүчингүй болдгийг анхаараарай.
  4. Энэ үнэлгээгээ даатгалын компанийн ажилтантай тохиролцоно.
  5. Хашаа байшингаа үер ус, бороо цас, шуурга, гал гэх мэт осол эрсдлийн алинаар нь даатгуулахаа та даатгагчтай тохиролцоно.
  6. Одоо даатгалын гэрээний бусад хэсгүүдийг сайтар харна. Даатгалын компани нөхөн төлбөрөө ямар нөхцөлд өгөх, эсвэл өгөхгүй, эсвэл бууруулж өгөх гэдэг талаар сайтар ярилц.
  7. Даатгалын компани болон даатгагч таны хүлээх үүрэг, эдлэх эрхийг гэрээнд хэрхэн тусгасан талаар үзэж танилц.
  8. Даатгалын осол эрсдэл учирсан бол ямар хугацаанд даатгагчид мэдэгдэх талаар лавла.
  9. Тодорхой хэмжээний мөнгөн төлбөр буюу даатгалын хураамжийг даатгалын компанид төлдөг. Даатгалын хураамж хэдэн хувиар төлөхөө тодруулж асуугаад хураамжаа төлөх нь зүйтэй.
  10. Сүүлийн шатанд даатгалын гэрээ болон даатгалын баталгаагаа баттай, мартахгүй газар хадгалаарай.

 

Эх сурвалж: Санхүүгийн зохицуулах хороо