Гэрэл зургийг mpa.mn

-Машин, тоног төхөөрөмж, цахилгаан хэрэгслийн импорт 39.6% өсжээ-

Манай улс 2018 онд 5.8 тэрбум ам.долларын бараа, бүтээгдэхүүн импортолсон байна. Энэ нь 2017 онтой харьцуулахад 1.54 тэрбум ам.доллар буюу 35.5 хувиар өссөн гэсэн үг. Тэр дундаа машин, тоног төхөөрөмж, цахилгаан хэрэгсэл, эд ангийн импорт 39.6% өсжээ. 2018 онд энэ төрлийн 1.3 тэрбум ам.долларын импорт хийсэн байна. 

Үүнээс бүх төрлийн тээврийн хэрэгслийн импорт 896.8 сая ам.долларт хүрч, 2017 оны дүнгээс 274.1 сая ам.доллараар өсжээ. 

2018 онд суудлын автомашин 64,039, ачааны автомашин 22,257 орж ирсэн байна. Өнгөрсөн оны мөн үетэй харьцуулахад 

• суудлын автомашины импорт 15,168-аар
• ачааны автомашины импорт 8,102-оор тус тус нэмэгдлээ.

Энэхүү хэрэгцээг дагаад шатахууны импорт ч өссөнийг статистик үзүүлэлтүүд харуулж байна. 

Тухайлбал, 2018 онд 435.5 мянган тонн автобензин импортлосон нь 2017 оны дүнгээс 24.6 мянган тонноор их байгаа бол дизель түлшний импорт 848.8 мянган тоннд хүрч, 2017 оны гүйцэтгэлээс 43.4 мянган тонноор өсөв.

Автобензины импортын тонн тутмын дундаж үнэ 593.3 ам.доллар байсан бол 2018 онд 708.8  ам.доллар болж өссөн бол дизель түлшний импортын дундаж үнэ 531.3 ам.доллараас 679.5 ам.доллар болж өссөн байна. 

Шахмал ногоон цайны импорт 323 тн-оор нэмэгдэв

Импортын дүнд өндөр хувь эзэлдэггүй ч хүн амын хэрэгцээний нэлээд хувийг импортоор хангагддаг зарим нэр төрлийн  бүтээгдэхүүний статистик үзүүлэлтийг сүүлийн хоёр жилийн байдлаар харуулбал, 

14 нэрийн хүнсний бүтээгдэхүүнээс 8 нэр төрлийн бүтээгдэхүүний импорт 324.9 мян.ам доллараас 5,527.8 мян ам доллараар өсжээ. Харин зургаан  нэр төрлийн бүтээгдэхүүний импорт 104.3 мян.ам доллараас 393.9 мян ам доллараар буурсан байна.

2018 оны байдлаар хүнсний гол нэрийн бүтээгдэхүүнээс үнийн дүнгээр 

• цагаан будааны импорт 5471.1 мянган ам.доллараар
• элсэн чихрийн импорт 5527.8 мянган ам.доллараар,
• ургамлын тосны импорт 1914.4 мянган ам.доллараар
• сонгино, сармисны импорт 1048.5 мянган ам.доллараар тус тус өссөн байна. 

Мөн шахмал ногоон цайны импорт 2017 оны арванхоёрдугаар сарын үзүүлэлтээс 323 тонноор нэмэгджээ. 

Харин

• алим лийрний импорт 304.4 мянган ам.доллараар
• хуурай сүүний импорт 394.9 мянган ам.доллараар
• маргарины импорт 355.2 мянган ам.доллараар тус тус буурсан байна.