Сар шинийн баяраар ажиллах эмнэлгүүд

Гэрэл зургийг mpa.mn

Монголын уламжлалт Сар шинийн баярын амралтын өдрүүдэд эмнэлгийн тусламж, үйлчилгээг ард иргэдэд хүргэх чиглэлийг өнөөдөр Эрүүл мэндийн яамнаас өгсөн юм.

Үүнд, эмнэлгүүд өндөржүүлсэн бэлэн байдалд ажиллах А/05 дугаар тушаал гарган, баярын өдрүүдэд ажиллах эмнэлгүүдийн цагийн хуваарийг баталж, хариуцлагатай жижүүрүүдийг томилжээ.

Тухайлбал, гуравдугаар шатлалын эмнэлгүүдийн яаралтай түргэн тусламжийн тасаг 24 цаг ажиллаж, иргэдэд үйлчлэх юм байна. 

Мөн сар шинийн баярын үеэр олон хоног амрах тул эмнэлгийн тусламж, үйлчилгээг цаг алдалгүй, тасралтгүй хүргэх, эм тариа, ороох, боох материал, өвчтөний хоол, хүнсийг хүрэлцэх хэмжээгээр нөөцлөх, гал, ус, цахилгааны аюулгүй байдлаа хангаж ажиллахыг эрүүл мэндийн байгууллагуудад үүрэг болгож, зохион байгуулалтыг хийж байгаа аж.

Түргэн тусламжийн төв болон дүүргүүдийн хүүхдийн түргэн тусламжийн хэсгүүдийн бэлэн байдлыг хангах, шаардлагатай үед хүн хүч нэмж ажиллуулах, эмнэлгүүд ор нөөцлөх, болзошгүй гамшиг, халдварт өвчин, хордлогын үед үзүүлэх тусламж, үйлчилгээг сайжруулахыг эмнэлгүүдэд давхар сануулсан талаар ЭМЯ мэдээлэв.

Сар шинийн баяраар ажиллах эрүүл мэндийн байгууллагуудын цагийн хуваарь:

Түүнчлэн доорх зөвлөмжийг хэрэгжүүлж, эрүүл мэндээ эрсдлээс хамгаалахыг Эрүүл мэндийн яамнаас уриалж байна:

• Бага насны хүүхдийг дагуулж айл хэсэхгүй байх,
• Хүүхдийг шүлсдэж үнсэхгүй байх,
• Хүүхдийн хамарт гавар, оксилины тосон түрхлэг зэргийг түрхэх,
• Давс, сод, нимбэгний уусмалаар хоолойгоо зайлах,
• Хүүхдийг дулаан хувцаслах, хэт бигнэхгүй байх,
• Гэртээ чийгтэй цэвэрлэгээ хийх, агааржуулалт хийх,
• Гар ариутгагч, нойтон сальфетка тавих,
• Амаар дамжуулан хүүхдэд хоол өгөхгүй байх,
• Аяга, халбагаа дамжуулан хэрэглэхгүй байх,
• Бага насны хүүхдийг машины зориулалтын суудалд суулгах,
• Хоол хүнсээ тохируулж хэрэглэх,
• Хийжүүлсэн ундаа хүүхдэд өгөхгүй байх,
• Халуун, бүлээн аньс, чацаргана, аарц хэрэглэх,
• Гэнэт 38 хэмээс дээш халуурах, тууралт гарах зэрэг шинж тэмдгүүд илэрвэл эмчид яаралтай хандах,
• Жирэмсэн эмэгтэйчүүд, бага насны хүүхэд, өндөр настны эрүүл мэндэд онцгой анхаарах,
• Хоолны хордлогоос сэргийлж салат, зуушийг өдөр бүр шинээр хийж байх,
• Ууцыг халуун газар хадгалахгүй байх,
• Түргэн муудах бүтээгдэхүүнийг хөргөгчинд хадгалах,
• Бэлэн болон түүхий хүнсийг тусад нь хадгалах,
• Хүнсний бүтээгдэхүүнийг бүрэн болгож хэрэглэх,
• Алсын замд гарахдаа машины бүрэн бүтэн байдлыг хангах,
• Хамгаалалтын бүс хэрэглэх,
• Хурд болон суудлын даац хэтрүүлэхгүй байх,
• Архи согтууруулах ундаа хэрэглэсэн үедээ машин барихгүй байх зэрэг болно.