Сингапур улс ерөнхий болон их, дээд сургуулийн боловсролын чанараараа дэлхийд дээгүүр бичигддэг.
Тус улсын боловсролын тогтолцоо нь бусад улстай харьцуулахад илүү урт хугацааны төлөвлөгөөг дэмжин ажилладаг ба хүүхдийг аль болох багаас нь суралцуулах сонирхолтой байдаг аж.
Гэтэл саяхан Сингапур улс энэхүү урт хугацааны тогтолцоогоо эргэн харж, өөрчлөлт оруулаад байна.
Ингэснээр бага ангийн сурагчдын мэдээлэл цуглуулсан байдлыг үнэлэх шинэлэг болон хамгийн оновчтой аргыг нэвтрүүлж байгаа хэмээн тус улсын боловсролын салбарынхан үзэж байгаа юм.
Энэхүү шинэ тогтолцоог нэвтрүүлснээр бага ангийн сурагчид өрсөлдөөнт болон харьцуулагдсан нөхцөл байдлаас ангид байж, зөвхөн өөрийн суралцах чадвартаа анхаарах боломжтой болох аж.
Мөн сурагчдыг үнэлдэг байсан хичээл бүрийн дүн нь аравтын бутархай бус, хамгийн ойрын бүхэл тоогоор дүгнэгдэж эхлэх юм байна.
Сингапур улсын Боловсролын сайд Он Ие Кунг "Манай улс ирэх жилүүдэд боловсролын салбартаа хэд хэдэн өөрчлөлтийг хийхээр төлөвлөөд байна.
Ялангуяа, сурагчдыг хооронд нь харьцуулсан, өрсөлдөөнт орчныг арилгах тал дээр анхаарч байгаа гэсэн үг. Ингэснээр сурагчдыг өөрсдийнхөө сурлагад илүү анхаарлаа хандуулах, бусад зөөлөн ур чадвараа хөгжүүлэх боломжийг нь олгох тал дээр илүү ажиллаж байна” гэлээ.
Шалгалтын дүнгээр тодорхойлдог байсан тогтолцоог өөрчилснөөр ирээдүйд илүү нээлттэй, бүтээлч хүмүүсийг бий болгож, тус улсын цаашдын төлөв байдлыг өөрчлөх бүрэн боломжтойг тус улсын боловсролын салбарынхан онцолж байлаа.
Академик мэдлэг олгож буй ердийн хичээлийн хажуугаар суулгах энэхүү шинэ чадварууд нь сурагчдыг нийгэмд биеэ зөв авч явах, өөрийгөө бусдад ойлгуулах, бусадтай харилцах, шийдвэр гаргах гэгчлэн олон давуу талыг бий болгоно хэмээн үзэж байна.
Энэхүү шинэ аргачлал нь ирэх жилээс хэрэгжих ба сурагчдын мэдээллийг хадгалдаг, бид бүхний хэлж заншсан "журнал” дээр сурагчдыг дундаж болон хамгийн доод, дээд оноогоор үнэлэн жагсаахыг болиулж байгаа аж.
Эдийн засаг, хамтын ажиллагааны олон улсын байгууллага(OECD) гурван жил тутам дэлхий даяар 15 настай сурагчийн дундах шинжлэх ухааны мэдлэг, тоо бодох болон унших чадварыг хэмжин, дэлхий дахины ерөнхий боловсролын дундаж тогтолцоог үнэлдэг байна.
Тэгвэл Сингапур улс хамгийн сүүлд хийгдсэн энэхүү үнэлгээг 1,655 оноотойгоор тэргүүлсэн бол Ази Номхон далайн Хонг Конг, Япон, Макао зэрэг улс ард нь бичигдсэн байна.
Энэ нь бид бүхний сайн мэдэх Их Британи, АНУ зэрэг өндөр боловсролтой улсын ерөнхий боловсролын чанарыг дээрх орнууд хол хаяж буйг харуулав.
Эх сурвалж: World Economic Forum