ФОТО: Хичээлийн шинэ жилийн нээлт

О.Булган, iKon.mn

2018 оны 9 сарын 1

iKon.MN

Гэрэл зургийг: mpa.mn

2018-2019 оны хичээлийн шинэ жилийн нээлт өнөөдөр ЕБС, цэцэрлэгүүдэд болж өндөрлөлөө.

БСШУС-ын сайд Ц.Цогзолмаа Японы мэргэжлийн сумо бөхийн 70 дахь Их аварга Харүмафужи Д.Бямбадоржийн "Шинэ Монгол Харумафужи" сургуулийн хичээлийн шинэ жилийн нээлтэд оролцсон юм.

ЕРӨНХИЙ БОЛОВСРОЛЫН СУРГУУЛИЙН ХУВЬД:

Энэ жил ерөнхий боловсролын 814 (төрийн 660, хувийн 154) сургуульд нийт 597.2 мянган суралцагч суралцана.
Нийт сургуулийн 69.2 хувь буюу 563 нь хөдөөд, 30.8 хувь буюу 251 нь нийслэлд үйл ажиллагаа явуулна.
Нийт суралцагчдын 55.9 хувь болох 333.8 мянга нь хөдөөд, 44.1 хувь буюу 263.4 мянга нь нийслэлийн сургуульд тус тус суралцана.
Өнгөрсөн хичээлийн жилтэй харьцуулахад сургуулийн тоо 16-аар, суралцах хүүхдийн тоо 24.4 мянгаар нэмэгдэнэ.
Урьдчилсан тооцоогоор 1 дүгээр ангид 76.4 мянган хүүхэд элсэн орно. Үүнээс Улаанбаатар хотод 35.4 мянган хүүхэд элсэнэ. 1-р ангид элсэгчид өнгөрсөн оныхоос 8.2 мянгаар нэмэгдэнэ. Харин 10 дугаар ангид 39.4 мянган хүүхэд дэвшин суралцана (9 дүгээр анги төгсөгчдийн 87.7 хувь үргэлжлүүлэн суралцана)
Хичээлийн шинэ жилд улсын хэмжээнд нийт 30 мянган багш ажиллана. Тэдний 27.3 мянга нь төрийн өмчийн сургуульд, 2.7 мянган нь хувийн өмчийн сургуульд тус тус ажиллана.

СУРГУУЛИЙН ӨМНӨХ БОЛОВСРОЛЫН ХУВЬД:

2018-2019 оны хичээлийн жилд нийт 1,435 цэцэрлэг үйл ажиллагаа явуулна. Төрийн өмчийн 889 (үүнээс 27 нь төмөр замын харьяа хүүхдийн цэцэрлэг), хувийн 546 цэцэрлэг үйл ажиллагаа явуулах бэлтгэл хангаад байгаа нь өмнөх оноос төрийн өмчийн цэцэрлэг 25-аар, хувийн хэвшлийн цэцэрлэг 8-аар тус тус нэмэгдсэн дүнтэй байна.
2018 онд улс, нийслэл, дүүргийн хөрөнгө оруулалтаар 25 цэцэрлэг шинээр ашиглалтад орж, орны тоо 3,185 нэмэгдэх бөгөөд үүнээс 9 дүгээр сарын 1-ний өдөр төрийн өмчийн 13 цэцэрлэг шинээр ашиглалтад орж, орны тоо 2085-аар нэмэгдэж байна. Урьдчилсан мэдээгээр 260,000 хүүхэд сургуулийн өмнөх боловсролд хамрагдана.
Сургуулийн өмнөх боловсролын салбарт нийт 27,172 багш, ажиллагчид ажиллаж байгаагийн 28.5 хувь нь буюу 7,745 нь үндсэн багш байна. Мөн 6,970 туслах багш, 1,307 эрхлэгч, 606 арга зүйч ажиллана.