“The Voice of Mongolia” шоуны оролцогчид шилдэг уран бүтээлүүдийг шинэ, содон хувилбараар хүргэж чадлаа

Дэлхийн 60 гаруй оронд амжилттай зохиогдсон телевизийн алдартай шоу нэвтрүүлэг “The Voice” “Монгол ТВ” телевизийн албан ёсны эрхтэйгээр Монголд анх удаа 2018 оны нэгдүгээр сарын 21-ний өдөрөөс эхлэн үзэгчдэд хүрч эхэлсэн.

Баяр гуниг хосолсон сэтгэл хөдөлгөм тоглолтууд 5 сарын турш үргэлжилсэний эцэст 2018 оны тавдугаар сарын 27-ны өдөр үндэсний дуу хоолой, шилдэгийн шилдэг ялагчаар Д.Уламбаяр шүүгчийн багийн шилдэг оролцогч Ц.Энгүүн үзэгчдийн саналаар тодорсон юм.

Ц.Энгүүн нь Монгол Улсын Консерваторын хийл хөгжмийн ангид суралцдаг, өдгөө 17 настай урлагийн гараагаа дөнгөж эхлүүлж буй авьяаслаг охин юм.

Гал гарсан хүчтэй өрсөлдөөн дундаас цорын ганц ялагч болсон тэрээр шоуны эхний шатанд “Runnin” дуугаар авьяас чадвараа харуулж 4 шүүгчээс өөрийн дасгалжуулагчийг сонгох алтан боломжийн эзэн болсон билээ. Түүний энэ үзүүлбэр Монголын үзэгчдийг гайхшруулаад зогсохгүй “The Voice of global” буюу дэлхийн хэмжээний шилдэг оролцогчдийн үзүүлбэрүүд дунд багтаж чадсан нь түүнийг эхний шатнаасаа л ялагч болох магадлалтай оролцогчдийн тоонд оруулж чадлаа.

 

 

 

 

 

“The Voice of Mongolia” шоу нэвтрүүлэгт 2,000 гаруй хүн бүртгүүлснээс эхний шатанд 100 гаруй оролцогч шоуны  4 шүүгчид авьяас чадвараа шалгуулж ердөө 66 оролцогч тэнцэн тэдний багт хуваагдан орсон. Шоуны туршид эдгээр авьяаслаг залуус маань дэлхийн тайзнаа Монголын болоод дэлхийн шилдэг уран бүтээлүүдийг шинэ, содон, сонирхолтой хувилбараар хүргэж үзэгчдийн хайр хүндлэлийг хүлээн тэднийг талцуулаад авсан юм. Ийнхүү финалийн шатанд 4 шүүгч тус бүрийн 1 оролцогч шалгаран өрсөлдсөн бөгөөд шоуны дүрэм ёсоор Отгонбаяр шүүгчийн багийн шилдэг оролцогч А.Болормаа, Д.Уламбаяр шүүгчийн багийн шилдэг оролцогч Ц.Энгүүн нар үзэгчдийн саналаар шалгарч шоуны ялагч болоход дахин нэг алхмаар ойртсон юм.

Тэд “Voice of Mongolia”  шоуны анхны ялагчийн төлөө өөрсдийн цоо шинэ дуугаараа өрсөлдөн үзэгчдийн саналаар Ц.Энгүүн  шилдгийн шилдэгээр тодорч “Монголын шинэ дуу хоолой” гэх хүндтэй нэрийн эзэн болсон юм.

Тус шоу нэвтрүүлэг “Монгол ТВ” телевизийн баг хамт олноос гадна ивээн тэтгэгчид, хамтарч ажилласан байгууллагууд гээд нийт 500 гаруй хүний хүч хөдөлмөр, зүтгэлийн үр дүнд амжилттай болж өндөрлөлөө.

Эх сурвалж: “Монгол ТВ” телевиз