Монголчуудын ердөө 2% нь л шинэ машин унадаг

Авто техникийн улсын үзлэг, тооллогын дүнгээр 2016 онд 499.2 мянган авто машин тоологджээ. Энэ нь 2015 оноос 3.5 хувиар буюу 17.1 мянгаар нэмэгдсэн үзүүлэлт аж. 

Авто машины:

• 72.2 хувийг суудлын,
• 22.3 хувийг ачааны,
• 3.8 хувийг автобус,
• 1.7 хувийг тусгай зориулалтын авто машин эзэлж байна. 

2015 оноос суудлын авто машины эзлэх хувь 1.0 пунктээр өсч, ачааны машин, автобусных тус бүр 0.5 пунктээр буурсаныг Үндэсний Статистикийн Хорооны тайланд дурджээ. 

Нийт авто машины 80 орчим хувийг 10-аас дээш жилийн ашиглалттай машин эзэлж байна. 

2015 онд нийт авто машины 3.0 хувийг 3 хүртэл жил, 20.3 хувийг 4-9 жил, 76.7 хувийг 10-аас дээш жил ашигласан авто машин эзэлж байсан бол 2016 онд 2.1 хувийг 3 хүртэл жил, 19.0 хувийг 4-9 жил, 78.9 хувийг 10-аас дээш жил ашигласан авто машин эзэлж байна.  Үүнээс үзвэл манай иргэдийн ердөө хоёрхон хувь нь шинэ, шинэвтэр машин хэрэглэдэг аж. 

2016 оны үзүүлэлтээр нийт авто машинд 10-аас дээш жил ашигласан авто машины эзлэх хувь өмнөх оноос 2.2 пунктээр өсчээ. Авто замын хөдөлгөөнд оролцож байгаа 500 мянга орчим  авто тээврийн хэрэгслээс ялгарч буй утаа, угаарын хий нь агаарын бохирдлын 10 хувийг бүрдүүлж байгааг судалгаанаас харж болно.